راولپنڈی: پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے خیبرپختونخوا کے دو مختلف علاقوں میں دہشت گردوں کے خلاف کامیاب کارروائیاں کیں، جن میں 15 دہشت گرد ہلاک جبکہ 4 جوان شہید ہوگئے۔
کراچی کے علاقے عزیز آباد میں سیلنڈر دھماکہ، گھر تباہ، 4 افراد زخمی
پہلی کارروائی ڈیرہ اسماعیل خان میں کی گئی، جہاں انٹیلیجنس بیسڈ آپریشن کے دوران سیکیورٹی فورسز نے دہشت گردوں کے ٹھکانے کو نشانہ بنایا۔ اس آپریشن میں 9 دہشت گرد مارے گئے، جن میں انتہائی مطلوب دہشت گرد فرمان عرف ثاقب، امان اللہ عرف طوری، سعید عرف لیاقت اور بلال شامل تھے۔ یہ دہشت گرد سیکیورٹی فورسز پر حملوں میں ملوث تھے۔
دوسری کارروائی شمالی وزیرستان کے علاقے میران شاہ میں کی گئی، جہاں 6 دہشت گردوں کو ہلاک کیا گیا۔ اس آپریشن میں شدید فائرنگ کے تبادلے کے دوران 21 سالہ لیفٹیننٹ محمد حسان اشرف شہید ہوگئے، جو لاہور سے تعلق رکھتے تھے۔
اس جھڑپ میں تین دیگر جوانوں نے بھی اپنی جان کا نذرانہ پیش کیا، جن میں نائب صوبیدار محمد بلال (39 سال، تعلق ڈیرہ اسماعیل خان)، سپاہی فرحت اللہ (27 سال، تعلق لکی مروت) اور سپاہی ہمت خان (29 سال، تعلق ضلع مہمند) شامل ہیں۔
آئی ایس پی آر کے مطابق دہشت گردوں کے مکمل خاتمے کے لیے سینیٹائزیشن آپریشنز جاری ہیں، اور سیکیورٹی فورسز ملک سے دہشت گردی کے ناسور کے خاتمے کے لیے پرعزم ہیں۔
