سیہون: حضرت لعل شہباز قلندر رح کی مزار پر زائرین سے اوقاف کے ملازمین کی جانب سے نذرانہ وصول کرنے کی ویڈیو سوشل میڈیا پر وائرل ہونے کے بعد وزیر اعلیٰ سندھ سید مراد علی شاہ نے فوری طور پر نوٹس لے لیا۔ ویڈیو میں 12 اوقاف ملازمین کو زائرین سے نذرانہ وصول کرتے ہوئے دیکھا گیا، جس پر عوامی ردعمل سامنے آیا۔
وزیر اعلیٰ سندھ نے اوقاف کے سیکریٹری سے واقعہ کی رپورٹ طلب کرتے ہوئے تحقیقات کا حکم دیا۔ ویڈیو کے منظر عام پر آنے کے بعد وزیر اوقاف سندھ، ریاض حسین شاہ شیرازی نے اس بات کی وضاحت کی کہ مزار پر آنے والے زائرین کو نذرانہ صرف مخصوص نذرانہ باکس میں ڈالنا چاہیے، اور کسی بھی شخص کو ہاتھ میں پیسے دینے کی اجازت نہیں ہونی چاہیے۔
انہوں نے کہا کہ اس نوعیت کی لوٹ مار کو سختی سے روکا جائے گا اور اس عمل کی بھرپور مخالفت کی جائے گی۔
سیکریٹری اوقاف سندھ نے تصدیق کی کہ 12 ملازمین کو معطل کر دیا گیا ہے اور اس معاملے کی مزید تحقیقات جاری ہیں تاکہ ایسے واقعات کی روک تھام کی جا سکے۔