تشکر نیوز: اسلام آباد، 31 دسمبر 2024 – نیول ہیڈ کوارٹرز اسلام آباد میں پاک بحریہ کی کمانڈ اینڈ اسٹاف کانفرنس اختتام پذیر ہو گئی۔ چیف آف دی نیول اسٹاف ایڈمرل نوید اشرف نے کانفرنس کی صدارت کی۔ اس اعلیٰ سطحی اجلاس میں بحیرہ ہند کی سیکورٹی صورتحال، قومی سمندری تجارت کے تحفظ اور خطے کی موجودہ جیو اسٹریٹجک چیلنجز کا جائزہ لیا گیا۔
کراچی میں گھریلو صارفین کو دن کے اوقات میں گیس کی فراہمی ناپید، ڈاکٹر فاروق ستار کا شدید ردعمل
کانفرنس کے دوران فورم نے نئے سال کی کثیر الجہتی مشق "امن” اور پہلے "امن ڈائیلاگ” کی تیاریوں پر تبادلہ خیال کیا۔ چیف آف دی نیول اسٹاف کو پاک بحریہ کے جاری اور مستقبل کے ترقیاتی منصوبوں پر جامع بریفنگ بھی دی گئی۔ اس کے علاوہ فورم نے قومی سلامتی، بحریہ کی آپریشنل تیاریوں، تربیتی حکمت عملیوں، اور اہلکاروں کی فلاح و بہبود جیسے امور پر بھی تفصیلی غور و خوض کیا۔
ایڈمرل نوید اشرف نے بحری سرحدوں کی حفاظت، میری ٹائم سیکیورٹی کو مضبوط بنانے، اور جدید ٹیکنالوجی کے حصول کے ذریعے صلاحیتوں میں اضافے پر زور دیا۔ انہوں نے جنگی تیاریوں کو برقرار رکھنے اور اہلکاروں کے جذبے کی بھرپور تعریف کی۔
کمانڈ اینڈ سٹاف کانفرنس پاک بحریہ کا اہم فیصلہ ساز فورم ہے، جہاں پالیسیوں اور منصوبوں کا جائزہ لیا جاتا ہے اور مستقبل کی حکمت عملیوں کی تشکیل کی جاتی ہے۔