وزیراعظم شہباز شریف کا افغان حکومت سے کالعدم ٹی ٹی پی کے خلاف ٹھوس حکمت عملی کا مطالبہ

وزیراعظم شہباز شریف نے وفاقی کابینہ کے اجلاس سے خطاب کرتے ہوئے افغان حکومت پر زور دیا کہ وہ کالعدم تحریک طالبان پاکستان (ٹی ٹی پی) کے خلاف ٹھوس اور مؤثر حکمت عملی اختیار کرے۔ انہوں نے کہا کہ پاکستان اور افغانستان کے تعلقات بہتر کرنے کی خواہش ہے، لیکن ٹی ٹی پی کی پاکستان میں کارروائیاں ناقابل قبول ہیں۔
آزاد کشمیر میں پاک فوج کے تعاون سے آل کشمیر یوتھ فیسٹیول کرکٹ ٹورنامنٹ کا شاندار آغاز

وزیراعظم نے واضح کیا کہ ایک طرف تعلقات بڑھانے کا پیغام ملے اور دوسری طرف دہشت گردوں کو کھلی چھوٹ دی جائے تو یہ دو عملی قابل قبول نہیں۔ انہوں نے مزید کہا کہ پاکستان اپنی سالمیت اور عوام کے تحفظ کے لیے ہر ممکن اقدام کرے گا۔

سیکیورٹی فورسز کی قربانیاں
وزیراعظم نے شمالی وزیرستان میں خوارج کے خلاف سیکیورٹی فورسز کی کامیاب کارروائی اور بہادری سے لڑتے ہوئے شہید ہونے والے جوانوں کو خراج عقیدت پیش کیا۔ انہوں نے جنوبی وزیرستان میں 16 ایف سی جوانوں کی شہادت کا ذکر کرتے ہوئے دہشت گردی کے خاتمے کے لیے فورسز کے عزم کو سراہا۔

افغانستان میں پاکستانی کارروائی پر ردعمل
ٹی ٹی پی کے حملوں کے جواب میں پاکستان کے لڑاکا طیاروں نے افغانستان کے مشرقی صوبے پکتیکا میں ٹی ٹی پی کے مبینہ کیمپوں پر بمباری کی، جس پر افغان حکومت نے شدید احتجاج کیا۔

بے نظیر بھٹو کو خراج عقیدت
وزیراعظم نے سابق وزیراعظم شہید بینظیر بھٹو کو ان کی برسی پر خراج عقیدت پیش کرتے ہوئے کہا کہ وہ ایک دلیر اور مثالی خاتون تھیں جنہوں نے جمہوریت اور ملک کے لیے گراں قدر قربانیاں دیں۔

دیگر حکومتی اقدامات
وزیراعظم نے پاراچنار میں طبی امداد کے لیے دوائیں اور مریضوں کی منتقلی کا ذکر کرتے ہوئے این ڈی ایم اے کے کردار کو سراہا۔ انہوں نے اسحٰق ڈار اور دیگر حکام کی کوششوں سے مالی مسائل کے حل پر بھی اطمینان کا اظہار کیا۔

کرکٹ کی تیاریاں
وزیراعظم نے آئی سی سی ایونٹس کے لیے مکمل تیاریوں کا اعلان کیا اور قوم کو اچھی کرکٹ دیکھنے کی امید دلائی۔