تشکر نیوز — قائداعظم محمد علی جناح کے یومِ پیدائش کے موقع پر چیئرمین جوائنٹ چیفس آف اسٹاف کمیٹی، مسلح افواج کے سربراہان اور افواج پاکستان نے بابائے قوم کو خراجِ عقیدت پیش کیا۔ پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان میں کہا گیا کہ مسلح افواج قائداعظم کے لازوال وژن اور بے مثال قیادت کو سراہتی ہیں، جن کی انتھک کوششوں نے عوام کو متحد کیا اور ایک خودمختار و آزاد پاکستان کی بنیاد رکھی۔
آرمی چیف جنرل عاصم منیر کی کرسمس کی تقریب میں شرکت، مسیحی برادری کے ساتھ یکجہتی کا اظہار
آئی ایس پی آر کے مطابق، اس دن ہم قائداعظم کے اصولوں—اتحاد، ایمان اور نظم و ضبط—کے لیے اپنی غیر متزلزل وابستگی کی تجدید کرتے ہیں۔ مسلح افواج نے اس موقع پر کرسمس کی خوشیوں میں مسیحی برادری کو دلی مبارکباد دی اور کہا کہ ہم اپنے مسیحی بھائیوں اور بہنوں کے ساتھ یکجہتی کے طور پر محبت، اخوت اور امن کی عالمی اقدار کا جشن مناتے ہیں۔
اعلامیے میں مزید کہا گیا کہ مسلح افواج قوم کی حفاظت اور وطن کی خدمت میں انصاف، مساوات اور ہم آہنگی کے نظریات کو برقرار رکھنے کے لیے پُرعزم ہیں۔