سندھ ہائیکورٹ میں سندھ بلڈنگ کنٹرول اتھارٹی (ایس بی سی اے) کے رولز نہ بنانے کے خلاف دائر درخواست کی سماعت ہوئی، جس میں چیف سیکرٹری سندھ، ڈی جی ایس بی سی اے، اور دیگر متعلقہ فریقین کو جواب جمع نہ کروانے پر درخواست گزار کے وکیل نے اعتراض اٹھایا۔ درخواست گزار کے مطابق، پچھلے چار سال سے جواب جمع نہیں کروایا گیا ہے۔
بلوچستان حکومت کا 3700 بند اسکولوں کو دوبارہ کھولنے کا فیصلہ
فریقین نے عدالت سے جواب کے لیے مزید وقت کی درخواست کی اور اس بات کی یقین دہانی کرائی کہ سپریم کورٹ کے احکامات پر عمل درآمد کیا جائے گا اور نیا قانون تیار کیا جائے گا۔ سرکاری وکیل نے بتایا کہ رولز کا ڈرافٹ تیار ہو چکا ہے، لیکن اسے مکمل کرنے کے لیے مزید وقت درکار ہے تاکہ متعلقہ اتھارٹی کے ساتھ مشاورت کی جا سکے۔
عدالت نے سرکاری وکلاء سے استفسار کیا کہ جب رولز ابھی تک موجود نہیں ہیں تو ان پر عمل درآمد کیسے ہو رہا ہے؟ وکیل طارق منصور نے عدالت کو بتایا کہ ایس بی سی اے کو ریگولیشنز کی بنیاد پر چلایا جا رہا ہے، جو کہ غیر قانونی ہے، کیونکہ آرڈیننس 1979 میں آنے کے باوجود ایس بی سی اے کے رولز ابھی تک مرتب نہیں کیے گئے۔
عدالت نے فریقین کو 23 اکتوبر تک جواب جمع کروانے کا حکم دیتے ہوئے سماعت ملتوی کر دی۔