یوم دفاع و شہداء کی پروقار تقریب آج جنرل ہیڈ کوارٹرز (جی ایچ کیو) راولپنڈی میں منعقد ہوگی، جہاں وطن کے دفاع میں جان قربان کرنے والے شہداء کو خراج عقیدت پیش کیا جائے گا۔
یومِ دفاع کی مرکزی تقریب آج رات 8 بجے جی ایچ کیو میں منعقد ہو گی
پاکستان کی افواج نے 6 ستمبر کو ازلی دشمن بھارت کو عبرتناک شکست دے کر شجاعت و بہادری کی نئی تاریخ رقم کی، اور یہ دن قومی تاریخ کا ایک درخشاں باب ہے۔ ملک بھر میں یوم دفاع و شہداء کا دن قومی اور ملی جوش و جذبے سے منایا جا رہا ہے، اور مرکزی تقریب جی ایچ کیو راولپنڈی میں منعقد ہو رہی ہے۔
اس تقریب کا مقصد شہداء اور ان کے اہل خانہ کو خراج عقیدت پیش کرنا ہے۔ تقریب میں وزیراعظم شہباز شریف مہمان خصوصی ہوں گے، جبکہ چیف آف آرمی سٹاف جنرل سید عاصم منیر، اعلیٰ سول اور عسکری قیادت سمیت دیگر معززین شرکت کریں گے۔
شہداء کے اہل خانہ، وفاقی کابینہ کے ارکان، قانون دان اور معروف شخصیات بھی تقریب میں شرکت کریں گی۔ وزیراعظم اور آرمی چیف یادگارِ شہداء پر پھول چڑھائیں گے اور شہداء کے ایصالِ ثواب کے لیے دعا کی جائے گی۔
تقریب کا آغاز تلاوتِ کلام پاک سے ہوگا، جس کے بعد قومی ترانہ پڑھا جائے گا۔ اس دوران افواجِ پاکستان اور قانون نافذ کرنے والے اداروں کے شہداء کی لازوال قربانیوں کو خراج تحسین پیش کیا جائے گا، جبکہ شہداء کے ورثاء کے صبر اور عزم کو بھی سلام کیا جائے گا۔
وزیراعظم پاکستان اور چیف آف آرمی سٹاف تقریب سے خطاب بھی کریں گے۔ یوم دفاع کے حوالے سے نیول، ائیر بیسز، چھاؤنیوں اور ملک بھر میں مختلف تقریبات بھی منعقد کی جا رہی ہیں۔