شمالی کیلیفورنیا میں لگنے والی آگ 24 گھنٹوں کے دوران سائز میں دگنی سے بھی زیادہ ہو گئی ہے، خوفناک آتشزدگی ساڑھے 3 لاکھ ایکڑ سے زائد رقبے پر پھیل چکی ہے اور اس کو امریکا میں جنگلات میں لگنے والی سب سے بڑی آگ قرار دیا جارہا ہے۔
تشکر اخبار میں شائع غیر ملکی خبررساں اداروں کی رپورٹ کے مطابق کیلیفورنیا ڈیپارٹمنٹ آف فاریسٹری اینڈ فائر پروٹیکشن کے مطابق، پاک فائر (آگ کو دیا گیا نام) نے ہفتے کی شام تک ریاستی دارالحکومت سیکرامنٹو کے شمال میں تقریباً 90 میل (144 کلومیٹر) کے فاصلے پر ساڑھے 3 لاکھ ایکڑ (141,640 ہیکٹر) سے زیادہ رقبہ کو جلا دیا تھا۔
کراچی: مچھرکالونی میں 4 کروڑ روپے تاوان کیلئے 2 کمسن بھائیوں کا قتل
خطے میں ٹھنڈے درجہ حرارت اور مرطوب ہواؤں کی وجہ سے ممکنہ طور پر آگ کے پھیلاؤ کو کم کرنے کی کوششوں میں مدد ملے گی، حکام نے بتایا کہ آگ سے ہونے والا نقصان اندازوں سے کہیں زیادہ ہے، اب تک آگ سے 134 ڈھانچے تباہ ہوچکے ہیں۔
حکام کی جانب سے متعدد کاؤنٹیوں میں کمیونٹیز کے لیے انخلا کے احکامات جاری کیے گئے ہیں، جن میں پیراڈائز کے لیے ایک انتباہ بھی شامل ہے، یہ قصبہ جو 2018 کے تاریخی کیمپ فائر سے تباہ ہوا تھا۔
وائٹ ہاؤس کے ایک عہدیدار نے بتایا کہ امریکی صدر جو بائیڈن کو آگ کے بارے میں بریفنگ دی گئی ہے اور انہوں نے اپنی ٹیم کو ہدایت کی ہے کہ وہ اس پر قابو پانے کے لیے ہر بھرپور تعاون کریں گے۔
حکام کے مطابق ایک شخص نے مبینہ طور پر جلتی ہوئی گاڑی کو خشک جھاڑیوں میں دھکیل کر آگ لگائی جس سے اس خوفناک آگ کا آغاز ہوا، آگ لگانے والے شخص کو گرفتار کرلیا گیا ہے۔
نیشنل انٹرایجنسی فائر سینٹر کے مطابق، یہ آگ ماضی میں لگی درجنوں آگ میں سب سے بڑی تھی جس نے 20 لاکھ ایکڑ سے زیادہ رقبہ کو جلا دیا ہے۔
’اب تک کی سب سے بڑی آگ‘
حکام نے ہفتے کے روز بتایا کہ شمالی کیلیفورنیا میں لگنے والی آگ مغربی ریاست میں اب تک کی سب سے بڑی آگ بن چکی ہے، جس نے 4 ہزار سے زائد لوگوں کو انخلا پر مجبور کیا۔
کیلیفورنیا ڈیپارٹمنٹ آف فاریسٹری اینڈ فائر پروٹیکشن نے مائیکربلاگنگ ویب سائٹ ’ایکس‘ پر ایک پوسٹ میں کہا، ’ خوفناک آگ پر قابو پانے کے لیے فائر فائٹرز کو مشکلات کا سامنا کرنا پڑرہا ہے’۔
پارک فائر کا آغاز بٹے کاؤنٹی میں چیکو کے مقام سے ہوا جس نے چند گھنٹوں کے دوران تیھاما کاؤنٹی کے وسیع علاقے کو تباہ کر دیا۔