متحدہ قومی موومنٹ پاکستان نے چیئرمین پیپلز پارٹی بلاول بھٹو زرداری کے بیان پر ردعمل کا اظہار کیا ہے۔
ایم کیو ایم کے ترجمان نے کہا کہ زرداری خاندان کے افراد حکومت اور ریاست کو بلیک میل کرنے کا سلسلہ بند کریں۔
ترجمان نے کہا کہ بلاول بھٹو کے اعترافِ جرم پر ایم کیو ایم ان کی مشکور ہے۔ انہوں نے سوال اٹھایا کہ اگر ملک بھر میں نئے صوبے بننے ہیں تو خونریزی صرف کراچی اور شہری سندھ میں کیوں ہوگی؟
ان کے مطابق نئے صوبوں کا قیام آئینی تقاضا ہے۔ اس معاملے پر گفتگو کرنے پر شدید ردعمل سمجھ سے بالاتر ہے۔
نئے صوبوں کے قیام کی حمایت کا مطالبہ
ترجمان ایم کیو ایم پاکستان نے کہا کہ سندھ کے شہری علاقوں کی اکثریت نئے صوبوں کے قیام کی حمایت کرتی ہے۔ ان کے مطابق بلاول بھٹو کو سندھ کی حقیقی نمائندگی کرتے ہوئے اس مطالبے کی حمایت کرنی چاہیے۔
ترجمان نے کہا کہ ایم کیو ایم شہری سندھ کو مزید لوٹ کا مال نہیں بننے دے گی۔ انہوں نے بلاول بھٹو سے 27ویں آئینی ترمیم کے معاملے پر بھی وضاحت طلب کی۔
ان کا سوال تھا کہ ترمیم کی مخالفت کرنے والے بعد میں اس کی حمایت میں ووٹ کیوں دے رہے تھے؟
کرپشن اور سندھ حکومت پر تنقید
ترجمان نے کہا کہ بلاول بھٹو نے ایم کیو ایم کے مؤقف کی حمایت کرتے ہوئے کرپشن کو ملک کی تباہی کی بڑی وجہ قرار دیا ہے۔
انہوں نے سوال کیا کہ کیا بلاول بھٹو گزشتہ 18 سال سے سندھ میں حکمرانی کرنے والی جماعت کے دور میں ہونے والی مبینہ بدعنوانی پر بھی قوم کو آگاہ کریں گے؟
ترجمان نے ایک بار پھر زرداری خاندان کے افراد سے حکومت اور ریاست کو بلیک میل کرنے کا سلسلہ بند کرنے کا مطالبہ کیا۔