کراچی کے علاقے کورنگی نمبر 5 میں واقع فیملی ماڈل پارک سے مبینہ طور پر 2 سالہ بچہ اغوا ہوگیا۔
واقعے کا مقدمہ بچے کے والد کی مدعیت میں تھانہ عوامی کالونی میں درج کرلیا گیا ہے۔ بچے کی شناخت عبدالحمدان کے نام سے ہوئی ہے۔
سی سی ٹی وی فوٹیج میں خاتون بچے کو لے جاتی دکھائی دی
واقعے کی سامنے آنے والی سی سی ٹی وی فوٹیج میں ایک خاتون کو بچے کو پارک سے لے جاتے دیکھا جاسکتا ہے۔
فوٹیج کے مطابق خاتون کے ساتھ مزید دو بچے بھی موجود تھے۔ تاہم ان دونوں بچوں کی شناخت اور خاتون سے تعلق کے بارے میں تاحال تفصیلات سامنے نہیں آئیں۔
والد نے بچے کے لاپتا ہونے کا واقعہ بیان کردیا
بچے کے والد کے مطابق ان کی اہلیہ اپنی بہن اور والدہ کے ہمراہ بچے کو پارک لے گئی تھیں۔
ان کا کہنا ہے کہ شام تقریباً 4 بجے کھیلتے ہوئے بچہ اچانک نظروں سے اوجھل ہوگیا۔ اطلاع ملتے ہی وہ پارک پہنچے اور بچے کی تلاش شروع کردی۔
پولیس کی سی سی ٹی وی فوٹیج کی مدد سے تحقیقات
پولیس کے مطابق واقعے کے مختلف پہلوؤں سے تحقیقات جاری ہیں۔ سی سی ٹی وی فوٹیج کی مدد سے بچے کا سراغ لگانے اور اسے بازیاب کرانے کی کوشش کی جارہی ہے۔
واقعے کے بعد پارک کی سکیورٹی اور نگرانی کے انتظامات پر بھی سوالات اٹھ رہے ہیں۔ تاہم پارک انتظامیہ یا والدین کی جانب سے غفلت کے حوالے سے تاحال کوئی حتمی بات سامنے نہیں آئی۔
