کراچی میں وزیراعلیٰ سندھ سید مراد علی شاہ کی زیرصدارت پبلک پرائیویٹ پارٹنرشپ (پی پی پی) پالیسی بورڈ کا 53واں اجلاس ہوا۔ اجلاس میں تعلیم، انفراسٹرکچر، پانی، نکاسی آب اور عوامی سہولیات سے متعلق منصوبوں پر غور کیا گیا۔
ترجمان وزیراعلیٰ سندھ کے مطابق بورڈ نے سات صوبائی محکموں کی ترقیاتی تجاویز منظور کرلیں۔ اجلاس میں صوبائی وزراء ناصر حسین شاہ، سردار شاہ اور جام خان شورو سمیت دیگر حکام شریک ہوئے۔
750 سرکاری اسکول نجی اداروں کے حوالے کرنے کا فیصلہ
پی پی پی پالیسی بورڈ نے سندھ کے 750 سرکاری اسکولوں کو آؤٹ سورس کرنے کے دوسرے مرحلے کی منظوری دے دی۔ نجی تعلیمی انتظامی ادارے 10 سالہ معاہدے کے تحت ان اسکولوں کا انتظام سنبھالیں گے۔
بریفنگ کے مطابق یہ منصوبہ سندھ سیکنڈری ایجوکیشن امپروومنٹ پروجیکٹ (SSEIP) اور سندھ ارلی لرننگ انہانسمنٹ پروگرام (SELECT) کے تحت مکمل ہوگا۔
منصوبے میں SSEIP کے 453، SELECT کے 295 اور پیپلز اسکولز کے دو ادارے شامل ہیں۔ SSEIP کے 453 اسکولوں میں 401 اضافی فنڈنگ اور 52 اصل فنڈنگ کے تحت شامل ہیں۔
ان 750 اسکولوں میں 3 لاکھ 45 ہزار 940 طلبہ کی گنجائش ہے۔ اس وقت وہاں ایک لاکھ 88 ہزار 852 طلبہ زیرِ تعلیم ہیں۔
اساتذہ اور دیگر اخراجات حکومت برداشت کرے گی
اجلاس کو بتایا گیا کہ آؤٹ سورسنگ سے پہلے تین ماہ کا انتظامی اور تیاری کا مرحلہ مکمل ہوگا۔ نجی ادارے تدریسی اور غیر تدریسی عملے کی بھرتی کے ذمہ دار ہوں گے۔
اساتذہ کی تنخواہیں اور دیگر اخراجات سندھ حکومت برداشت کرے گی۔ حکومت غیر تدریسی عملے، یونیفارم، اسٹیشنری اور روزمرہ اخراجات بھی فراہم کرے گی۔ اسکولوں کا انتظام چلانے والے اداروں کو مینجمنٹ فیس بھی ادا کی جائے گی۔
منصوبہ مختلف پیکجز میں مرحلہ وار نافذ ہوگا۔ بورڈ نے تکنیکی اور مالیاتی جائزہ کمیٹی قائم کرنے کی منظوری بھی دے دی۔ نجی اداروں کے انتخاب کے لیے قومی سطح پر کھلی مسابقتی بولی ہوگی۔ یہ عمل ای پی اے ڈی ایس ڈیجیٹل پلیٹ فارم کے ذریعے مکمل کیا جائے گا۔
اساتذہ کی تربیت کے لیے جدید ادارہ قائم کرنے کا فیصلہ
اجلاس میں سندھ انسٹیٹیوٹ آف ٹیچر ایجوکیشن کو پبلک پرائیویٹ پارٹنرشپ کے تحت ترقی دینے کی منظوری بھی دی گئی۔
منصوبہ دربین کی جانب سے پیش کیا گیا۔ بریفنگ کے مطابق یہ ڈگری جاری کرنے والا ادارہ ہوگا۔ اس کا انتظام، آپریشن اور دیکھ بھال نجی شراکت دار کے سپرد کی جائے گی۔
ادارے میں تحقیق پر مبنی تعلیم اور جدید تدریسی طریقوں کو فروغ دیا جائے گا۔ اساتذہ اور تعلیمی اداروں کے سربراہان کی پیشہ ورانہ تربیت بھی منصوبے کا حصہ ہوگی۔
پی پی پی پالیسی بورڈ نے منصوبے کے نظرثانی شدہ فریم ورک کی منظوری دے دی۔ وزیراعلیٰ سندھ نے کہا کہ اس ادارے کا قیام اساتذہ کی تربیت اور تعلیمی قیادت کے فروغ کے لیے اہم ہے۔
کیٹی بندر کو جدید بحری اور اقتصادی مرکز بنانے کا منصوبہ
وزیراعلیٰ سندھ نے کیٹی بندر کی ترقی کے لیے بھی اہم منصوبے کی منظوری دی۔ پی پی پی پالیسی بورڈ نے منصوبے کے ابتدائی تصور اور فزیبلٹی اسٹڈی کے لیے فنڈز منظور کرلیے۔
مراد علی شاہ کے مطابق کیٹی بندر کو بحری، صنعتی، لاجسٹکس اور توانائی کا مرکز بنایا جائے گا۔ منصوبے کے لیے ٹرانزیکشن ایڈوائزرز کی خدمات بھی حاصل کی جائیں گی۔
منصوبے کے چھ اہم شعبوں میں توانائی و پٹرولیم، صنعت و لاجسٹکس، بندرگاہ و بحری انفراسٹرکچر، جہاز سازی و بحری خدمات، مقامی آبادی و سیاحت اور ڈیجیٹل سکیورٹی شامل ہیں۔
اجلاس میں کیٹی بندر میں جدید فشنگ ہاربر، آئل ٹرمینلز، ٹینک فارمز اور پائپ لائنز کی تعمیر کی تجاویز پیش کی گئیں۔ اس کے علاوہ کارگو یارڈز، گودام اور صنعتی و برآمدی زونز بھی قائم کیے جائیں گے۔
منصوبے میں گہرے پانی میں جہازوں کے لنگرانداز ہونے کے لیے برتھس، شپ یارڈ، ڈرائی ڈاکس اور بحری ورکشاپس شامل ہوں گی۔ بحری شعبے کی تربیت کے لیے جدید مراکز بھی قائم کرنے کی تجویز ہے۔
ساحلی سیاحت کے فروغ کے لیے ہوٹلز، مرینا اور واٹر فرنٹ سہولیات فراہم کی جائیں گی۔ رہائشی، صحت اور تعلیمی سہولیات بھی منصوبے کا حصہ ہوں گی۔
بحری جہازوں کی آمدورفت کی نگرانی کے لیے ڈیجیٹل نظام نصب کیے جائیں گے۔ سکیورٹی اور ہنگامی حالات سے نمٹنے کے جدید انتظامات بھی شامل ہوں گے۔
وزیراعلیٰ سندھ نے منصوبے کے لیے پبلک پرائیویٹ پارٹنرشپ ماڈل تیار کرنے کی ہدایت کی۔ ان کے مطابق منصوبے سے نجی سرمایہ کاری، ماہی گیری اور توانائی کے شعبوں کو فروغ ملے گا۔ اس سے ساحلی علاقوں میں روزگار کے نئے مواقع بھی پیدا ہوں گے۔
کراچی فنانشل سینٹر کے ابتدائی تصور کی منظوری
اجلاس میں سندھ انٹرنیشنل فنانشل سینٹر کے تحت کراچی فنانشل سینٹر منصوبے پر بھی غور کیا گیا۔ اس کا مقصد کراچی کو علاقائی مالیاتی اور سرمایہ کاری کے مرکز کے طور پر مستحکم کرنا ہے۔
بریفنگ میں بتایا گیا کہ منصوبے کے ذریعے مالیاتی خدمات، انفراسٹرکچر، توانائی، ہاؤسنگ اور ٹیکنالوجی کے شعبوں میں سرمایہ کاری لانے کی کوشش کی جائے گی۔
پی پی پی پالیسی بورڈ نے کراچی فنانشل سینٹر کے ابتدائی تصور کی منظوری دے دی۔ وزیراعلیٰ سندھ نے منصوبے کی جامع فزیبلٹی اسٹڈی کرانے کی ہدایت بھی کی۔
منصوبے کی فزیبلٹی اسٹڈی اور مالیاتی ڈھانچے کی تیاری کے لیے فنڈز منظور کیے گئے۔ بریفنگ کے مطابق یہ رقم پروجیکٹ ڈیولپمنٹ فیسیلٹی (PDF) کے ذریعے فراہم کی جائے گی۔
بورڈ نے کراچی فنانشل سینٹر کے لیے ٹرانزیکشن ایڈوائزرز کی خدمات حاصل کرنے کی بھی منظوری دے دی۔
وزیراعلیٰ سندھ کے مطابق یہ منصوبہ کراچی میں سرمایہ کاری کے نئے مواقع پیدا کرنے میں اہم کردار ادا کرسکتا ہے۔
اجلاس میں اہم حکام کی شرکت
اجلاس میں صوبائی وزراء ناصر حسین شاہ، سردار شاہ اور جام خان شورو شریک ہوئے۔ چیف سیکریٹری آصف حیدر شاہ، اراکین سندھ اسمبلی غلام قادر چانڈیو اور قاسم سراج سومرو بھی موجود تھے۔
معاونین خصوصی قاسم نوید اور محمد علی راشد، پرنسپل سیکریٹری آغا واصف، چیئرمین پلاننگ اینڈ ڈیولپمنٹ نجم شاہ اور سینئر ممبر بورڈ آف ریونیو خالد حیدر شاہ سمیت دیگر افسران نے بھی اجلاس میں شرکت کی۔