اینٹی وہیکل لفٹنگ سیل (اے وی ایل سی) نے رضویہ کے علاقے میں مبینہ پولیس مقابلے کے بعد موٹر سائیکل لفٹنگ میں ملوث ایک ملزم کو زخمی حالت میں گرفتار کرلیا۔
پولیس کے مطابق کارروائی ایس ایس پی اے وی ایل سی خالد مصطفیٰ کورائی کی ہدایت پر کی گئی۔ ڈی آئی او لیاقت آباد کی نگرانی میں ٹیم معمول کے گشت پر تھی۔
پولیس پر فائرنگ اور جوابی کارروائی
پولیس کے مطابق ٹیم تھانہ رضویہ کی حدود میں پہنچی تو مشکوک موٹر سائیکل سوار کو رکنے کا اشارہ کیا۔ ملزمان نے رکنے کے بجائے فرار ہونے کی کوشش کی اور پولیس پارٹی پر فائرنگ کردی۔
پولیس نے جوابی کارروائی کی۔ فائرنگ کے تبادلے کے بعد ایک ملزم کو زخمی حالت میں گرفتار کرلیا گیا۔ اس کا دوسرا ساتھی اندھیرے کا فائدہ اٹھا کر فرار ہوگیا۔
گرفتار ملزم کی شناخت محمد فہیم ولد محمد ابراہیم کے نام سے ہوئی ہے۔
مسروقہ موٹر سائیکل اور پستول برآمد
اے وی ایل سی کے مطابق گرفتار ملزم کے قبضے سے ایک مسروقہ موٹر سائیکل اور ایک پستول برآمد ہوا۔ پولیس نے پستول کے ساتھ زندہ کارتوس بھی تحویل میں لے لیے۔
ابتدائی تفتیش میں ملزم نے موٹر سائیکل چوری کی متعدد وارداتوں میں ملوث ہونے کا اعتراف کیا ہے۔ پولیس ملزم کا سابقہ مجرمانہ ریکارڈ بھی چیک کر رہی ہے۔
پولیس نے ملزم کے خلاف مقدمہ درج کرکے مزید تفتیش شروع کردی ہے۔ فرار ہونے والے ساتھی کی گرفتاری کے لیے بھی کارروائی متوقع ہے۔
