ایس ایس پی ڈسٹرکٹ سینٹرل ڈاکٹر محمد عمران خان نے تیموریہ پولیس اور خواجہ اجمیر نگری کی شاہین فورس کے اہلکاروں کی حوصلہ افزائی کرتے ہوئے انہیں تعریفی اسناد اور نقد انعامات سے نوازا ہے۔ پولیس کے مطابق دونوں علاقوں میں الگ الگ مقابلوں کے دوران تین مبینہ ڈاکو ہلاک ہوئے۔
تیموریہ تھانے کی حدود میں گشت کرنے والے پولیس اہلکاروں نے مبینہ ڈاکوؤں سے مقابلے کے بعد ایک ملزم کو ہلاک کردیا۔ دوسری کارروائی خواجہ اجمیر نگری تھانے کی حدود میں ہوئی، جہاں شاہین فورس کے اہلکاروں نے پولیس مقابلے کے دوران دو مبینہ ڈاکوؤں کو ہلاک کیا۔
ایس ایس پی ڈسٹرکٹ سینٹرل نے دونوں کارروائیوں میں حصہ لینے والے اہلکاروں کی بہادری، پیشہ ورانہ مہارت اور جرائم پیشہ عناصر کے خلاف کارروائی کو سراہا۔ انہوں نے اہلکاروں کو ان کی کارکردگی پر شاباش دی اور تعریفی اسناد کے ساتھ نقد انعامات بھی پیش کیے۔
ڈاکٹر محمد عمران خان نے کہا کہ بہادر اور فرض شناس اہلکار محکمہ پولیس کا قیمتی اثاثہ ہیں۔ جرائم پیشہ عناصر کے خلاف مؤثر کارروائی اور شہریوں کے جان و مال کا تحفظ پولیس کی اہم ذمہ داری ہے۔
انہوں نے اہلکاروں کو ہدایت کی کہ وہ اسی جذبے اور فرض شناسی کے ساتھ اپنی ذمہ داریاں ادا کرتے رہیں۔ ان کا کہنا تھا کہ جرائم کے خاتمے اور شہریوں کے تحفظ کے لیے پولیس کی کوششوں کو مزید مؤثر بنانے کی ضرورت ہے۔
یہ تفصیلات ایس ایس پی ڈسٹرکٹ سینٹرل کے ترجمان کی جانب سے جاری کردہ بیان میں بتائی گئیں۔
