کراچی کی انسداد دہشت گردی کی خصوصی عدالت نے سانحہ 12 مئی کے تین مقدمات میں متحدہ قومی موومنٹ (ایم کیو ایم) کے تین کارکنوں کو بری کردیا۔
عدالت نے عمیر صدیقی، رئیس الدین عرف رئیس مما اور مرزا نسیم الدین عرف رضوان چپاتی کی بریت کا فیصلہ سنایا۔ سماعت کراچی سینٹرل جیل میں قائم انسداد دہشت گردی کمپلیکس میں ہوئی۔
سرکاری وکیل اور وکیل صفائی کے دلائل
سماعت کے دوران جیل حکام نے ایم کیو ایم کے سابق سیکٹر انچارج رئیس مما اور رضوان چپاتی کو عدالت میں پیش کیا۔
سرکاری وکیل نے مؤقف اختیار کیا کہ رئیس مما اور رضوان چپاتی نے ضابطۂ فوجداری کی دفعہ 164 کے تحت اپنے بیانات میں اعترافِ جرم کیا تھا۔
دوسری جانب وکیل صفائی مشتاق احمد نے کہا کہ ملزمان کے خلاف کوئی ٹھوس ثبوت موجود نہیں۔ ان کے مطابق گواہوں کے بیانات میں بھی تضاد پایا جاتا ہے۔
وکیل صفائی نے مزید کہا کہ اعترافی بیانات میں قانونی تقاضے پورے نہیں کیے گئے۔ ان کا کہنا تھا کہ کسی گواہ نے ملزمان کو جائے وقوعہ پر نہیں دیکھا۔
ملزمان کی جانب سے وکلا نواز خان اور مشتاق احمد نے پیروی کی۔
سانحہ 12 مئی کے مقدمات
پولیس کے مطابق سانحہ 12 مئی سے متعلق سابق میئر کراچی وسیم اختر اور دیگر ملزمان کے خلاف چھ مقدمات زیر سماعت ہیں۔
رپورٹ کے مطابق بری ہونے والے کارکنوں کے خلاف مقدمہ 2007 میں ایئرپورٹ تھانے میں درج کیا گیا تھا۔ عدالت نے زیر سماعت تین مقدمات میں نامزد تینوں کارکنوں کو بری کردیا۔
