قی وزیر خزانہ سینیٹر محمد اورنگزیب نے خطے میں جاری جیو پولیٹیکل کشیدگی کو پاکستان کے لیے ایک اہم وارننگ قرار دیتے ہوئے واضح کیا ہے کہ ملک کو توانائی کے روایتی ذرائع پر انحصار کم کر کے متبادل اور پائیدار توانائی کی جانب فوری پیش رفت کرنا ہوگی۔
پروجیکٹ فریڈم کی معطلی: وزیراعظم شہباز شریف کا صدر ٹرمپ کے اقدام کا خیرمقدم، خطے میں امن کی امید
وفاقی دارالحکومت میں کیپیٹل مارکیٹ ڈیویلپمنٹ فنڈ کی تقریب سے خطاب کرتے ہوئے وزیر خزانہ کا کہنا تھا کہ حالیہ علاقائی صورتحال نے یہ ثابت کر دیا ہے کہ توانائی کے شعبے میں خود کفالت نہایت ضروری ہے۔ انہوں نے کہا کہ عالمی سطح پر بدلتی ہوئی صورتحال اور تیل و گیس کی سپلائی میں ممکنہ رکاوٹیں پاکستان جیسے ترقی پذیر ممالک کے لیے سنگین چیلنجز پیدا کر سکتی ہیں، لہٰذا بروقت حکمت عملی اپنانا ناگزیر ہو چکا ہے۔
محمد اورنگزیب نے کہا کہ پاکستان کی قیادت خطے میں کشیدگی کے خاتمے اور امن کے فروغ کے لیے مسلسل سفارتی کوششیں کر رہی ہے، تاہم ہمیں اندرونی طور پر بھی اپنی معیشت کو مضبوط بنانے اور توانائی کے متبادل ذرائع جیسے قابل تجدید توانائی (Renewable Energy) کی طرف تیزی سے بڑھنا ہوگا۔ ان کا کہنا تھا کہ توانائی کے شعبے میں اصلاحات اور تنوع لانے سے نہ صرف درآمدی بل میں کمی آئے گی بلکہ ملکی معیشت کو بھی استحکام حاصل ہوگا۔
وزیر خزانہ نے اپنے خطاب میں کیپیٹل مارکیٹ کی اہمیت پر بھی زور دیتے ہوئے کہا کہ معاشی ترقی کے لیے سرمایہ مارکیٹ کا کردار کلیدی حیثیت رکھتا ہے۔ انہوں نے کہا کہ مشکل معاشی حالات کے باوجود پاکستان اسٹاک مارکیٹ نے استحکام کا مظاہرہ کیا ہے، جو سرمایہ کاروں کے اعتماد کا مظہر ہے۔ ان کا کہنا تھا کہ معاشی اشاریوں میں بہتری آ رہی ہے اور حکومت کی توجہ کرنٹ اکاؤنٹ خسارے اور مالیاتی نظم و ضبط پر مرکوز ہے۔
انہوں نے مزید کہا کہ پاکستان کو خود انحصاری کی جانب گامزن ہونا ہوگا اور اس کے لیے مقامی سرمایہ کاری کو فروغ دینا انتہائی ضروری ہے۔ سرمایہ کاروں کو ملک کے اندر سرمایہ کاری کے مواقع فراہم کرنا اور ان کا اعتماد بحال کرنا حکومت کی اولین ترجیحات میں شامل ہے۔
وزیر خزانہ نے اس عزم کا اعادہ کیا کہ حکومت جامع معاشی پالیسیوں کے ذریعے ملک کو درپیش چیلنجز سے نکال کر پائیدار ترقی کی راہ پر گامزن کرے گی، جبکہ توانائی کے متبادل ذرائع کی طرف منتقلی اس حکمت عملی کا مرکزی ستون ہوگی۔