کراچی میں سینٹرل ڈسٹرکٹ پولیس کی بڑی کارروائیاں، منشیات، گٹکا ماوا اور موٹر سائیکل چوری میں ملوث متعدد ملزمان گرفتار

کراچی میں سینٹرل ڈسٹرکٹ پولیس کی بڑی کارروائیاں، منشیات، گٹکا ماوا اور موٹر سائیکل چوری میں ملوث متعدد ملزمان گرفتار

خبر:
کراچی: ایس ایس پی ڈسٹرکٹ سینٹرل کی ہدایت پر پولیس نے مختلف تھانوں کی حدود میں جرائم پیشہ عناصر کے خلاف کامیاب اور مربوط کارروائیاں کرتے ہوئے متعدد ملزمان کو گرفتار کر لیا۔ کارروائیوں کے دوران منشیات، گٹکا ماوا، آئس اور چوری شدہ موٹر سائیکلیں برآمد کی گئیں۔

تھانہ تیموریہ پولیس نے دورانِ گشت کارروائی کرتے ہوئے گٹکا ماوا فروش ملزم فرہاد ولد ابراہیم کو گرفتار کر کے 6 پیکٹ سیفینا گٹکا برآمد کیا۔ اسی تھانے کی ایک اور کارروائی میں منشیات فروش صادق علی عرف بلو اور صدام کو گرفتار کر کے مجموعی طور پر 265 گرام ہیروئن برآمد کی گئی۔

تھانہ ناظم آباد پولیس نے آئس فروخت کرنے والے ملزم یعقوب عرف سندھی کو گرفتار کیا جبکہ اس کا ساتھی موقع سے فرار ہو گیا۔ ملزم سے 55 گرام آئس برآمد ہوئی۔

گلبرگ پولیس نے موٹر سائیکل لفٹر شاداب ولد زاہد حسین کو گرفتار کر کے چوری شدہ موٹر سائیکل برآمد کر لی جبکہ ایک اور کارروائی میں گٹکا ماوا فروش کامران جعفری کو گرفتار کیا گیا۔

تھانہ سپر مارکیٹ پولیس نے دو منشیات فروشوں اوزیر اور اویس کو گرفتار کر کے 1070 گرام چرس اور نقد رقم برآمد کی۔ اسی طرح ایف بی انڈسٹریل ایریا پولیس نے گٹکا ماوا سپلائر نعیم خان کو گرفتار کر لیا۔

رضویہ پولیس نے بھی منشیات فروش شعیب کو گرفتار کر کے آئس برآمد کی۔ پولیس کے مطابق تمام ملزمان کے خلاف متعلقہ دفعات کے تحت مقدمات درج کر کے مزید تفتیش جاری ہے۔

پولیس کا کہنا ہے کہ ڈسٹرکٹ سینٹرل میں جرائم پیشہ عناصر کے خلاف بلا امتیاز کارروائیاں جاری رہیں گی اور شہریوں کے جان و مال کے تحفظ کو ہر صورت یقینی بنایا جائے گا۔