کراچی میں بولٹن مارکیٹ میں تجاوزات کے خلاف بڑا کریک ڈاؤن کیا گیا۔ کارروائی کمشنر کراچی کی ہدایت پر کی گئی۔
اسسٹنٹ کمشنر آرام باغ حازم بھنگوار کے مطابق آپریشن کے دوران 18 افراد کو گرفتار کیا گیا۔ گرفتار افراد کے خلاف ایف آئی آر بھی درج کرلی گئی ہیں۔
حازم بھنگوار نے کہا کہ قبضہ مافیا نے قدیم مارکیٹ پر اپنا تسلط قائم کر رکھا تھا۔ انتظامیہ نے مارکیٹ سے تمام غیر قانونی قبضے ختم کروا دیے ہیں۔
انہوں نے کہا کہ تجاوزات کے باعث شہریوں کا چلنا مشکل ہوگیا تھا۔ فٹ پاتھ بھی تجاوزات کی نذر ہوچکے تھے۔
اسسٹنٹ کمشنر آرام باغ نے واضح کیا کہ انتظامیہ کسی بھی مارکیٹ پر مافیا کا قبضہ برداشت نہیں کرے گی۔ تجاوزات کے خلاف کارروائیاں جاری رہیں گی۔
