کراچی (16 اپریل 2026) — سندھ حکومت نے معذور افراد کو بااختیار بنانے کے لیے اہم پیش رفت کرتے ہوئے معاون آلات کی فراہمی کی مد میں 800 ملین روپے جاری کر دیے ہیں۔ یہ رقم صوبے بھر کی 105 پارٹنر تنظیموں اور این جی اوز کے ذریعے مستحق افراد میں تقسیم کی جا رہی ہے۔
عاصم منیر کا تہران میں اہم عسکری دورہ، ایران سے تعاون پر تبادلہ خیال
وزیراعلیٰ سندھ سید مراد علی شاہ نے وزیر اعلیٰ ہاؤس میں منعقدہ تقریب سے خطاب کرتے ہوئے کہا کہ کسی بھی معاشرے کی اصل پہچان یہ ہے کہ وہ اپنے کمزور طبقات کے ساتھ کیسا سلوک کرتا ہے۔ انہوں نے اس اقدام کو شمولیت، وقار اور مساوی مواقع کے فروغ کی جانب ایک اہم سنگ میل قرار دیا۔
وزیراعلیٰ نے کہا کہ حکومت سندھ وہیل چیئرز، سماعت کے آلات، مصنوعی اعضا اور دیگر معاون آلات کی فراہمی یقینی بنا رہی ہے تاکہ معذور افراد بھی معاشرے اور معیشت میں فعال کردار ادا کر سکیں۔ انہوں نے واضح کیا کہ معذوری نااہلی نہیں بلکہ درست سہولیات کے ساتھ یہ افراد ملک کی ترقی میں نمایاں کردار ادا کر سکتے ہیں۔
تقریب میں بتایا گیا کہ محکمہ بااختیار افرادِ باہم معذوری (DEPD) کے تحت سندھ بھر میں 67 سرکاری مراکز اور 90 پارٹنر این جی اوز خدمات انجام دے رہی ہیں، جبکہ خصوصی تعلیمی اداروں میں داخلوں میں 26 فیصد اضافہ ریکارڈ کیا گیا ہے۔
وزیراعلیٰ سندھ نے مزید کہا کہ صوبے میں ڈیجیٹل کلاس رومز، بحالی مراکز اور مہارت کی ترقی کے پروگراموں کو وسعت دی جا رہی ہے تاکہ معذور افراد کو خودمختار اور باعزت زندگی فراہم کی جا سکے۔ اس موقع پر آٹزم اور بحالی مراکز کے لیے ایک ارب روپے کے انڈومنٹ فنڈ کی منظوری کو بھی اہم پیش رفت قرار دیا گیا۔
تقریب کے اختتام پر خصوصی بچوں نے مختلف پرفارمنسز پیش کیں جبکہ حکومت اور پارٹنر اداروں کے درمیان مفاہمتی یادداشت پر بھی دستخط کیے گئے۔ وزیراعلیٰ نے کہا کہ سندھ حکومت کا ہدف ایک ایسا “انکلوسیو سوسائٹی ماڈل” قائم کرنا ہے جہاں ہر شہری کو ترقی کے یکساں مواقع حاصل ہوں۔