کراچی: ڈسٹرکٹ سٹی پولیس کے سربراہ سید علی حسن نے لیاری کے مختلف علاقوں میں قائم پولیو سینٹرز کا دورہ کرتے ہوئے سیکیورٹی انتظامات اور پولیو مہم کی پیش رفت کا جائزہ لیا۔ ترجمان ڈسٹرکٹ سٹی پولیس کے مطابق یہ دورہ 13 اپریل 2026 کو کیا گیا۔
زمان ٹاؤن پولیس کی کارروائی، اے پلس کیٹیگری گٹکا فروش گرفتار
دورے کے دوران ایس ایس پی سٹی نے مختلف پولیو سینٹرز پر موجود میڈیکل آفیسرز اور پولیو ٹیموں سے ملاقات کی اور ان سے سیکیورٹی سمیت دیگر انتظامی امور پر تبادلہ خیال کیا۔ انہوں نے پولیو ورکرز کی خدمات کو سراہتے ہوئے ان کے تحفظ کو اولین ترجیح قرار دیا۔
پولیس حکام کے مطابق ڈسٹرکٹ سٹی میں جاری پولیو مہم کے دوران مجموعی طور پر 785 پولیس افسران و اہلکار سیکیورٹی کے فرائض سرانجام دے رہے ہیں، جو پولیو ٹیموں کے ہمراہ فیلڈ میں موجود ہیں تاکہ کسی بھی ناخوشگوار واقعے سے بچا جا سکے۔
ایس ایس پی سٹی سید علی حسن کا کہنا تھا کہ قانون نافذ کرنے والے ادارے پولیو ٹیموں کے ساتھ شانہ بشانہ کھڑے ہیں اور عوام کو صحت مند مستقبل فراہم کرنے کے لیے ہر ممکن اقدامات کیے جا رہے ہیں۔ انہوں نے مزید کہا کہ ایس ڈی پی اوز اور ایس ایچ اوز کو ہدایت کی گئی ہے کہ پولیو سینٹرز اور ٹیموں کو فول پروف سیکیورٹی فراہم کی جائے۔
پولیس ترجمان کے مطابق شہر میں امن و امان کی صورتحال کو برقرار رکھنے کے لیے ڈسٹرکٹ سٹی پولیس کی جانب سے مختلف علاقوں میں باقاعدگی سے پیٹرولنگ بھی کی جا رہی ہے، تاکہ پولیو مہم کے دوران کسی قسم کی رکاوٹ یا خطرہ پیدا نہ ہو۔