کراچی: کراچی پولیس کے ایڈیشنل آئی جی آزاد خان سے عائشہ باوانی اکیڈمی کے ڈائریکٹر سید امداد حسین شاہ کی قیادت میں وفد نے کراچی پولیس آفس میں ملاقات کی، جس میں پولیس حکام اور اکیڈمی انتظامیہ کے درمیان اہم امور پر تبادلہ خیال کیا گیا۔
روس کا امریکا سے الٹی میٹم کی زبان ترک کرنے کا مطالبہ
ملاقات کے دوران ڈی آئی جی ایڈمن، انچارج ویلفیئر برانچ (KPO)، اکیڈمی کے ایڈمنسٹریٹر مشتاق میاں سمیت دیگر افسران اور معززین بھی موجود تھے۔ اس موقع پر کراچی پولیس اور عائشہ باوانی اکیڈمی کے مابین مستحق اور اہل پولیس اہلکاروں کے بچوں کو معیاری تعلیمی سہولیات فراہم کرنے کے لیے مفاہمتی یادداشت (MoU) پر دستخط کیے گئے۔
معاہدے کا مقصد پولیس شہداء، مرحوم اور حاضر سروس ملازمین کے بچوں کو بہترین تعلیمی مواقع فراہم کرنا اور ان کی تعلیمی معاونت کو یقینی بنانا ہے۔ اس معاہدے کے تحت عائشہ باوانی اکیڈمی ہر تعلیمی سال کے آغاز پر مستحق طلبہ کو مختلف نوعیت کی اسکالرشپس فراہم کرے گی۔
اس حوالے سے ویلفیئر برانچ کراچی پولیس کو ذمہ داری سونپی گئی ہے کہ وہ اہل امیدواروں کی نامزدگی، جانچ پڑتال اور ضروری دستاویزات کی فراہمی کو یقینی بنائے۔
ایڈیشنل آئی جی کراچی آزاد خان نے اس اقدام کو پولیس اہلکاروں اور ان کے اہل خانہ کی فلاح و بہبود کے لیے اہم پیش رفت قرار دیتے ہوئے کہا کہ اس سے بچوں کو معیاری تعلیم کے بہتر مواقع میسر آئیں گے اور ان کے روشن مستقبل کی بنیاد مضبوط ہوگی۔
