کراچی (اسٹاف رپورٹر) – کراچی واٹر اینڈ سیوریج کارپوریشن نے شہر کے نشیبی علاقوں میں جمع ہونے والے برساتی پانی کی بروقت نکاسی کے لیے ہنگامی اقدامات کیے ہیں۔ ترجمان واٹر کارپوریشن کے مطابق مختلف ٹاؤنز اور حساس علاقوں میں جیٹنگ اور سکشن مشینیں متحرک کر دی گئی ہیں تاکہ پانی کی نکاسی کا عمل بلا تعطل جاری رہے۔
ترجمان نے بتایا کہ نشیبی علاقوں کی پیشگی نشاندہی کے بعد شاہراہِ فیصل، بلوچ کالونی، نرسری، ایف ٹی سی، سی ایم ہاؤس، گورنر ہاؤس، صدر، ٹاور اور بلاول چورنگی سمیت دیگر اہم مقامات پر مشینری تعینات کی گئی ہے۔ تمام ٹاؤنز میں جیٹنگ اور سکشن مشینیں پہنچا دی گئی ہیں اور پانی کی مکمل نکاسی تک عملہ اور مشینری فیلڈ میں موجود رہے گی۔
واٹر کارپوریشن نے اس بات کو یقینی بنایا کہ تمام متعلقہ ادارے اور بلدیاتی محکمے اس عمل میں موثر رابطے اور ہم آہنگی کے ساتھ کام کریں۔ ترجمان کا کہنا تھا کہ شہری علاقوں میں بروقت اقدامات کے باعث پانی کے بہاؤ میں بہتری آئے گی اور شہریوں کو ممکنہ مشکلات سے بچایا جا سکے گا۔
کارپوریٹ کمیونیکیشن ڈیپارٹمنٹ، کراچی واٹر اینڈ سیوریج کارپوریشن کی جانب سے جاری کردہ بیان میں مزید کہا گیا کہ شہر کے تمام نشیبی علاقوں میں نکاسی آب کا عمل تیزی سے جاری ہے اور متعلقہ افسران مسلسل صورتحال کا جائزہ لے رہے ہیں۔
