کراچی (اسٹاف رپورٹر) – کمشنر کراچی کی ہدایت پر ڈپٹی کمشنر کورنگی نے لانڈھی موبائل مارکیٹ کے خلاف بڑی کارروائی کرتے ہوئے اسے سیل کر دیا۔ انتظامیہ کے مطابق مارکیٹ میں فائر سیفٹی کے بنیادی انتظامات نہ ہونے کے باعث یہ اقدام اٹھایا گیا، تاکہ کسی بھی ممکنہ حادثے سے شہریوں کو محفوظ رکھا جا سکے۔
مدرسہ کے باہر ابلا ہوا گٹر، طلبہ کیلئے تعلیمی ماحول متاثر
ڈپٹی کمشنر کورنگی کا کہنا ہے کہ کمشنر کراچی کی جانب سے واضح اور سخت ہدایات جاری کی گئی ہیں کہ جن مارکیٹس میں فائر سیفٹی کا مؤثر نظام موجود نہیں، ان کے خلاف بلاامتیاز کارروائی کی جائے گی۔ اسی پالیسی کے تحت لانڈھی موبائل مارکیٹ کو سیل کیا گیا ہے، کیونکہ وہاں آگ بجھانے کے آلات اور ایمرجنسی رسپانس کا کوئی مناسب انتظام نہیں پایا گیا۔
انہوں نے مزید کہا کہ مارکیٹ مالکان اور دکانداروں کو متعدد بار تنبیہ کی گئی تھی کہ وہ فائر سیفٹی کے تقاضے پورے کریں، تاہم عدم تعاون اور غفلت کے باعث انتظامیہ کو سخت قدم اٹھانا پڑا۔ ان کا کہنا تھا کہ شہریوں کی جان و مال کا تحفظ اولین ترجیح ہے، اور اس حوالے سے کسی قسم کی کوتاہی برداشت نہیں کی جائے گی۔
ڈپٹی کمشنر کورنگی نے خبردار کیا کہ اگر دیگر مارکیٹس میں بھی فائر سیفٹی کے انتظامات بہتر نہ کیے گئے تو کورنگی ضلع میں کارروائیوں کا دائرہ مزید وسیع کیا جائے گا۔ انہوں نے کہا کہ یہ صرف انتظامیہ کی نہیں بلکہ مارکیٹ ایسوسی ایشنز اور دکانداروں کی بھی مشترکہ ذمہ داری ہے کہ وہ عوام کو محفوظ ماحول فراہم کریں۔
شہریوں اور تاجر برادری نے اس اقدام کو ملا جلا ردعمل دیا ہے، جہاں بعض افراد نے اسے ضروری قرار دیا، وہیں کچھ دکانداروں نے کاروباری نقصان پر تشویش کا اظہار بھی کیا۔ تاہم ماہرین کے مطابق فائر سیفٹی کے بغیر مارکیٹس کا چلنا کسی بڑے سانحے کو دعوت دینے کے مترادف ہے، اس لیے ایسے اقدامات ناگزیر ہیں۔
