کراچی: ضلع ملیر میں امن و امان کی صورتحال اور جرائم کی روک تھام کے حوالے سے اہم اجلاس ڈاکٹر عبدالخالق کی زیر صدارت ایس ایس پی آفس ملیر میں منعقد ہوا، جس میں متعلقہ ایس پی، ایس ڈی پی اوز اور ایس ایچ اوز نے شرکت کی۔
ڈسٹرکٹ سینٹرل میں کرائم میٹنگ، اسٹریٹ کرائم اور منشیات کے خلاف کریک ڈاؤن کی ہدایت
اجلاس کے دوران ضلع ملیر میں جرائم کی مجموعی صورتحال اور مختلف کیسز کا تفصیلی جائزہ لیا گیا۔ افسران کو ہدایت دی گئی کہ جرائم کی روک تھام کے لیے مؤثر اور عملی حکمت عملی اپنائی جائے تاکہ شہریوں کے جان و مال کا تحفظ یقینی بنایا جا سکے۔
ایس ایس پی ملیر نے اسٹریٹ کرمنلز، منشیات فروشوں اور گٹکا و ماوا کے کاروبار میں ملوث عناصر کے خلاف زیرو ٹالرنس پالیسی پر سختی سے عملدرآمد کی ہدایت جاری کی۔ انہوں نے کہا کہ اشتہاری اور مفرور ملزمان کی فوری گرفتاری کو ہر صورت یقینی بنایا جائے۔
اجلاس میں بغیر نمبر پلیٹ، ٹینٹڈ گلاس اور فوگ لائیٹس والی گاڑیوں کے خلاف بھی مؤثر کارروائی کی ہدایت دی گئی۔ اس کے ساتھ ساتھ اسنیپ چیکنگ، کامبنگ اور سرچ آپریشنز کو مزید مؤثر بنانے پر زور دیا گیا تاکہ جرائم پیشہ عناصر کی سرگرمیوں کو محدود کیا جا سکے۔
ایس ایس پی ملیر نے افسران کو شہریوں کے ساتھ خوش اخلاقی اور بہتر رویہ اختیار کرنے کی بھی ہدایت کی اور کہا کہ پولیس کا رویہ عوامی اعتماد کے لیے انتہائی اہم ہے۔ انہوں نے بہترین کارکردگی دکھانے والے ایس ایچ اوز کو سی سی تھرڈ سرٹیفکیٹس کے لیے نامزد کرنے کا اعلان بھی کیا۔
انہوں نے کہا کہ امن و امان کے قیام اور شہریوں کے تحفظ کے لیے تمام دستیاب وسائل بروئے کار لائے جائیں اور پولیس کی کارکردگی کو مزید بہتر بنایا جائے۔