کراچی (اسٹاف رپورٹر) – سندھ بلڈنگ کنٹرول اتھارٹی (SBCA) نے صوبے بھر میں، خاص طور پر کراچی میں مون سون کی متوقع بارشوں کے پیشِ نظر ہنگامی اقدامات شروع کر دیے ہیں اور فوری ردعمل کے لیے ’رین ایمرجنسی‘ نافذ کر دی ہے۔ صوبائی وزیر بلدیات سید ناصر حسین شاہ کی ہدایت پر یہ اقدامات کیے گئے ہیں تاکہ ممکنہ قدرتی آفات کے دوران جانی و مالی نقصان سے بچا جا سکے۔
کراچی میں کسٹمز کی بڑی انسداد اسمگلنگ کارروائی، 725 بوتلیں ضبط
ڈی جی ایس بی سی اے مزمل حسین ہالیپوٹو کے احکامات پر شہر کے مختلف اضلاع کے لیے 4 خصوصی ٹیمیں تشکیل دی گئی ہیں، جو 24 گھنٹے الرٹ رہیں گی۔ یہ ٹیمیں بارش کے دوران کسی بھی ناخوشگوار واقعے، عمارتوں کے گرنے یا ملبے تلے دبنے جیسی ہنگامی صورتحال میں فوری کارروائی کریں گی۔
سندھ بلڈنگ کنٹرول اتھارٹی نے پہلے ہی سینکڑوں عمارتوں کو ’انتہائی خطرناک‘ قرار دے رکھا ہے، اور یہ ٹیمیں ان عمارتوں کی مسلسل نگرانی کریں گی تاکہ کسی بھی حادثے سے قبل بروقت اقدامات کیے جا سکیں۔ اس مقصد کے لیے سوک سینٹر میں مرکزی رین ایمرجنسی سیل کو فعال کر دیا گیا ہے، جہاں عملہ چار شفٹوں میں کام کرے گا۔
ٹیموں کو ضروری مشینری، لیبر اور تکنیکی ماہرین فراہم کیے گئے ہیں تاکہ کسی بھی حادثے کی صورت میں امدادی کام فوری طور پر شروع کیے جا سکیں۔ ڈی جی ایس بی سی اے نے تمام ڈائریکٹرز کو اپنے اضلاع میں موجود رہنے اور فیلڈ ٹیموں کی خود نگرانی کرنے کا حکم بھی جاری کیا ہے۔
شہریوں کے لیے ہدایات:
SBCA نے خطرناک عمارتوں میں مقیم مکینوں کو ہدایت کی ہے کہ وہ بارش کے دوران زیادہ سے زیادہ احتیاط برتیں اور کسی بھی ہنگامی صورتحال کی صورت میں اتھارٹی کے فراہم کردہ ہیلپ لائن نمبرز پر فوری اطلاع دیں۔ شہریوں سے کہا گیا ہے کہ وہ غیر ضروری نقل و حرکت سے گریز کریں اور حفاظتی اقدامات پر عمل کریں تاکہ زندگیوں کو خطرے سے بچایا جا سکے۔
SBCA کا کہنا ہے کہ یہ اقدامات نہ صرف شہریوں کی حفاظت کو یقینی بنانے کے لیے ہیں بلکہ شہر کی بنیادی ڈھانچے کو بھی بارش کے ممکنہ اثرات سے محفوظ رکھنے میں مدد کریں گے۔