تہران / تل ابیب: ایران اور اسرائیل کے درمیان جاری کشیدگی اور حملوں کے نتیجے میں دونوں ممالک میں جانی و مالی نقصانات کے تازہ اعداد و شمار جاری کر دیے گئے ہیں۔ ایرانی امدادی تنظیم Iranian Red Crescent Society کے مطابق جنگ کے دوران ایران میں جاں بحق افراد کی تعداد بڑھ کر ایک ہزار 332 تک پہنچ گئی ہے۔
تعلیمی اداروں کی آن لائن منتقلی کی افواہیں بے بنیاد ہیں، وزیر تعلیم پنجاب
ہلال احمر کے جاری کردہ بیان کے مطابق اسرائیلی حملوں کے باعث ملک بھر میں 3 ہزار 643 عوامی مراکز کو نقصان پہنچا جبکہ 3 ہزار 90 رہائشی مکانات مکمل یا جزوی طور پر تباہ ہوگئے۔ رپورٹ کے مطابق 24 طبی مراکز کو بھی نشانہ بنایا گیا جبکہ ہلال احمر کے 9 دفاتر بھی حملوں کی زد میں آئے۔
دوسری جانب اسرائیلی حکام نے بھی ایرانی حملوں سے ہونے والے نقصانات کی تفصیلات جاری کی ہیں۔ اسرائیل کے سرکاری ادارے Israel Ministry of Health کے مطابق گزشتہ 24 گھنٹوں کے دوران ایرانی میزائل اور ڈرون حملوں کے نتیجے میں 140 افراد زخمی ہوئے۔
اسرائیلی محکمہ صحت کے مطابق زخمی ہونے والوں میں سے 114 افراد کو معمولی نوعیت کے زخم آئے جبکہ 19 افراد شدید زخمی ہیں اور ایک شخص کی حالت تشویشناک بتائی گئی ہے۔ حکام کے مطابق جنگ کے آغاز سے اب تک مجموعی طور پر ایک ہزار 619 اسرائیلی شہری زخمی ہو چکے ہیں۔
دونوں ممالک کے درمیان جاری اس تنازع کے باعث خطے میں کشیدگی میں مسلسل اضافہ ہو رہا ہے جبکہ عالمی برادری کی جانب سے جنگ بندی اور صورتحال کو قابو میں لانے کی اپیلیں بھی کی جا رہی ہیں۔