اسلام آباد: جمعیت علماء اسلام کے سربراہ مولانا فضل الرحمان نے ایران پر جارحیت کی شدید مذمت کرتے ہوئے کہا ہے کہ ایران اس وقت نہ صرف اپنا بلکہ فلسطین کا بھی دفاع کر رہا ہے اور عالم اسلام کو باہمی اتحاد کی اشد ضرورت ہے۔
سندھ حکومت کچے کے علاقوں کی ترقی کے لیے بڑا اقدام
مولانا فضل الرحمان نے یہ بات اسلام آباد میں ایرانی سفارتخانے میں ایرانی سفیر رضا امیری مقدم سے ملاقات کے دوران کہی۔ ملاقات میں ایران پر ہونے والے حملوں اور فلسطین کے موجودہ حالات پر تفصیلی گفتگو کی گئی۔ مولانا فضل الرحمان نے کہا کہ صیہونیت اور یورپ کا گٹھ جوڑ پہلے فلسطین پر قابض ہوا اور آج بھی فلسطینی عوام شدید تناؤ اور طویل جنگ کے دوران مشکلات کا سامنا کر رہے ہیں۔
انہوں نے مزید کہا کہ حماس کی مضبوط حمایت پر ایران کے خلاف جنگ کی ایک اور قسط شروع کی گئی ہے، اور بیہودہ الزامات لگا کر اس حملے کا جواز پیش کیا جا رہا ہے۔ مولانا فضل الرحمان نے کہا کہ مشکل وقت میں ایران کے شانہ بشانہ کھڑے ہیں اور امت مسلمہ کو ایک دوسرے کے ساتھ دست و گریباں ہونے کے بجائے صیہونیت کے خلاف متحد ہو کر مقابلہ کرنا چاہیے۔ انہوں نے امریکہ کو انسانیت کا دشمن قرار دیا۔
اس موقع پر ایرانی سفیر رضا امیری مقدم نے کہا کہ پاک ایران تعلقات میں مولانا فضل الرحمان اور جمعیت علماء اسلام کے کردار کو سراہتے ہیں اور اس جنگ میں فتح عالم اسلام کی ہوگی۔ رضا امیری مقدم نے مزید کہا کہ مولانا فضل الرحمان کی آمد ہمارے لیے اطمینان اور حوصلے کا باعث ہے۔
یہ ملاقات دونوں ممالک کے درمیان مضبوط تعلقات اور عالم اسلام میں اتحاد کے فروغ کے حوالے سے اہم سمجھی جا رہی ہے، جبکہ مولانا فضل الرحمان کی ایران کی حمایت نے پاکستان میں سیاسی اور مذہبی حلقوں میں بھی ایک مضبوط ردعمل پیدا کیا ہے۔