مشرقِ وسطیٰ میں کشیدگی خطرناک حد تک بڑھ گئی ہے جہاں ایران پر اسرائیل اور امریکا کے مبینہ حملوں کے بعد خطہ عملی طور پر جنگی صورتحال میں داخل ہوتا دکھائی دے رہا ہے۔ ایرانی حکام نے جوابی کارروائی میں خلیجی ممالک میں قائم امریکی تنصیبات کو نشانہ بنانے کی تصدیق کر دی ہے۔
شاہد آفریدی کا آپریشن “غضب للحق” پر پاک فوج کو خراج تحسین
ایرانی سرکاری ذرائع کے مطابق قطر میں واقع العدید ایئربیس، کویت کی السلیم ایئربیس، متحدہ عرب امارات کی الدفرا ایئربیس اور بحرین میں قائم امریکی بحری اڈے کو میزائل حملوں کا نشانہ بنایا گیا۔ اماراتی حکام کے مطابق جدید بیلسٹک میزائل دفاعی نظام فعال کر کے متعدد میزائل فضا میں تباہ کر دیے گئے، تاہم ایک ہلاکت کی بھی تصدیق کی گئی ہے۔ سکیورٹی خدشات کے باعث متحدہ عرب امارات نے اپنی فضائی حدود جزوی طور پر عارضی بند کر دیں۔
دوسری جانب عرب میڈیا کے مطابق ایرانی شہر مناب میں لڑکیوں کے اسکول پر اسرائیلی حملے میں 40 افراد شہید ہوئے، جن میں طالبات کی بڑی تعداد شامل بتائی جا رہی ہے۔ ایرانی حکام نے شدید مذمت کرتے ہوئے اسے جنگی جرم قرار دیا ہے۔
غیر ملکی خبر ایجنسی کے مطابق ایک اسرائیلی عہدیدار نے دعویٰ کیا ہے کہ حملوں میں ایرانی سپریم لیڈر علی خامنہ ای اور ایرانی صدر ابراہیم رئیسی کو بھی نشانہ بنایا گیا، تاہم ایرانی فوجی حکام نے اس حوالے سے کوئی باضابطہ تصدیق یا تردید نہیں کی۔
ادھر امریکی میڈیا رپورٹس کے مطابق ایران میں جاری آپریشن کی نگرانی امریکی صدر ڈونلڈ ٹرمپ کے ریزورٹ مارا لاگو سے کی جا رہی ہے، جبکہ امریکی وزیر دفاع اور جوائنٹ چیفس آف اسٹاف مسلسل صورتحال کا جائزہ لے رہے ہیں۔
برطانیہ نے واضح کیا ہے کہ وہ ایران پر حملوں میں شامل نہیں تاہم کشیدگی میں اضافے کا خواہاں بھی نہیں۔ برطانوی وزیر اعظم سر کیئر اسٹارمر نے ہنگامی صورتحال پر غور کیلئے کوبرا اجلاس طلب کر لیا ہے۔
پاکستان نے بھی ایران پر حملوں کی سخت مذمت کی ہے۔ ترجمان دفتر خارجہ کے مطابق نائب وزیر اعظم اسحاق ڈار نے ایرانی وزیر خارجہ عباس عراقچی سے ٹیلی فونک رابطہ کر کے کشیدگی میں فوری کمی اور سفارتی حل پر زور دیا۔
دریں اثنا سعودی عرب کے دارالحکومت ریاض میں بھی دھماکوں کی آوازیں سنی گئی ہیں، جب کہ خطے کے مختلف ممالک میں ہائی الرٹ نافذ کر دیا گیا ہے۔ صورتحال تیزی سے تبدیل ہو رہی ہے اور عالمی برادری کی نظریں آئندہ پیش رفت پر مرکوز ہیں۔