کراچی — قونصلیٹ جنرل آف اٹلی، کراچی کے زیر اہتمام کراچی میں ایک پروقار افطار ڈنر کا انعقاد کیا گیا جس میں حکومتی شخصیات، سفارت کاروں، دفاعی حکام اور مختلف شعبہ ہائے زندگی سے تعلق رکھنے والی ممتاز شخصیات نے شرکت کی۔ تقریب کا مقصد ماہِ رمضان کی روح کو اجاگر کرنا اور بین المذاہب ہم آہنگی کو فروغ دینا تھا۔
پاک افغان کشیدگی پر افغان وزیر خارجہ کا قطری ہم منصب سے رابطہ
تقریب میں کامران خان ٹیسوری نے بطور مہمانِ خصوصی شرکت کی، جبکہ کراچی شپ یارڈ اینڈ انجینئرنگ ورکس کے مینیجنگ ڈائریکٹر ریئر ایڈمرل سلمان الیاس، سیکٹر کمانڈر کمانڈر ناصر محمود اور دیگر اعلیٰ حکام بھی موجود تھے۔
اٹلی کے قونصل جنرل مسٹر Fabrizio Bielli نے مہمانوں کا خیرمقدم کرتے ہوئے اپنے خطاب میں کہا کہ وہ اس بابرکت موقع پر رمضان المبارک کی حقیقی روح کو اپنے پاکستانی دوستوں کے ساتھ منانے پر فخر محسوس کرتے ہیں۔ انہوں نے کہا کہ اس سال انہوں نے اور ان کی اہلیہ نے فیصلہ کیا ہے کہ وہ رمضان کی برکات اور اس کی روحانی فضا کو مقامی برادری کے ساتھ مل کر محسوس کریں گے۔
قونصل بیلی نے کہا کہ روزہ جسمانی اور روحانی جدوجہد کا حسین امتزاج ہے۔ کھانے پینے اور دیگر دنیوی آسائشوں سے اجتناب انسان کو نہ صرف صبر و برداشت سکھاتا ہے بلکہ روحانی بلندی کی جانب بھی راغب کرتا ہے۔ ان کے مطابق جسمانی قربانی دراصل روحانی ارتقا کا ذریعہ بنتی ہے اور رمضان المبارک اسی فلسفے کی عملی تصویر ہے۔
انہوں نے مزید کہا کہ یہ مقدس مہینہ انسان کو نیکی، عاجزی، سخاوت اور بہتر طرزِ عمل کی تلقین کرتا ہے اور معاشرے میں برداشت اور ہم آہنگی کو فروغ دیتا ہے۔
اپنے خطاب کے اختتام پر انہوں نے اس امید کا اظہار کیا کہ رمضان المبارک، جو اس سال نوروز، ہولی، چینی نئے سال اور ایسٹر جیسے دیگر مذہبی و ثقافتی تہواروں کے قریب آ رہا ہے، پوری انسانیت کے لیے صحت، خوشحالی اور امن کا پیغام لے کر آئے۔ انہوں نے کہا کہ مختلف تہواروں کا ایک ہی عرصے میں آنا اس امر کی یاد دہانی ہے کہ دنیا بھر کی ثقافتیں اور مذاہب امن، رواداری اور باہمی احترام کا درس دیتے ہیں۔
تقریب خوشگوار ماحول میں اختتام پذیر ہوئی جہاں مہمانوں نے بین الثقافتی مکالمے اور دوطرفہ تعلقات کے فروغ کے عزم کا اعادہ کیا۔
