کراچی — صوبے میں سیکیورٹی خدشات اور حالیہ صورتحال کے پیش نظر محکمہ داخلہ سندھ نے ڈرونز، کواڈ کاپٹرز، بغیر پائلٹ طیاروں (UAVs) اور ہیلی کیمز کی پرواز پر 60 روز کے لیے مکمل پابندی عائد کرنے کا نوٹیفکیشن جاری کر دیا ہے۔ حکام کے مطابق پابندی کا اطلاق فوری طور پر پورے صوبہ سندھ میں ہوگا اور اس دوران کسی بھی قسم کی نجی، تجارتی یا تفریحی بنیاد پر ڈرون اڑانے کی اجازت نہیں ہوگی۔
کراچی میں اطالوی قونصلیٹ کا روح پرور افطار ڈنر
ترجمان وزارت داخلہ و قانون سندھ کا کہنا ہے کہ یہ فیصلہ امن و امان کی مجموعی صورتحال، حساس مقامات کے تحفظ اور ممکنہ تخریبی سرگرمیوں کی روک تھام کے لیے کیا گیا ہے۔ اعلامیے میں کہا گیا ہے کہ حالیہ سیکیورٹی حالات کے تناظر میں احتیاطی اقدامات کو مزید مؤثر اور سخت بنانے کی ضرورت محسوس کی گئی، جس کے تحت ڈرونز کے استعمال پر عارضی پابندی ناگزیر تھی۔
نوٹیفکیشن کے مطابق قانون نافذ کرنے والے اداروں اور انٹیلی جنس ایجنسیوں کو اس پابندی سے استثنیٰ حاصل ہوگا تاکہ وہ اپنی پیشہ ورانہ ذمہ داریاں جاری رکھ سکیں۔ تاہم کسی بھی غیر متعلقہ فرد یا ادارے کی جانب سے پابندی کی خلاف ورزی کی صورت میں ضابطہ فوجداری کی دفعہ 144 کے تحت سخت قانونی کارروائی عمل میں لائی جائے گی۔ تمام ضلعی پولیس افسران اور متعلقہ تھانوں کے ایس ایچ اوز کو ہدایات جاری کر دی گئی ہیں کہ خلاف ورزی کرنے والوں کے خلاف فوری مقدمات درج کیے جائیں اور قانون کے مطابق کارروائی کو یقینی بنایا جائے۔
حکام کا کہنا ہے کہ صوبے میں اہم سرکاری و نیم سرکاری عمارتوں، عبادت گاہوں، تعلیمی اداروں، عوامی اجتماعات اور دیگر حساس تنصیبات کی سیکیورٹی کو مزید مضبوط بنانے کے لیے جامع حکمت عملی اپنائی جا رہی ہے۔ اس سلسلے میں پولیس اور دیگر سیکیورٹی اداروں کو الرٹ رہنے کی ہدایات بھی جاری کی گئی ہیں۔
محکمہ داخلہ سندھ نے شہریوں سے اپیل کی ہے کہ وہ قانون کی پاسداری کریں اور کسی بھی مشکوک سرگرمی یا غیر قانونی ڈرون پرواز کی فوری اطلاع قریبی پولیس اسٹیشن یا متعلقہ حکام کو دیں تاکہ بروقت کارروائی ممکن بنائی جا سکے۔
حکام کے مطابق یہ پابندی وقتی نوعیت کی ہے اور حالات کا مسلسل جائزہ لیا جا رہا ہے۔ امن و امان کی صورتحال بہتر ہوتے ہی پابندی کے حوالے سے آئندہ فیصلہ کیا جائے گا۔
