کراچی (اسٹاف رپورٹر): سید حسن نقوی نے ماہِ صیام کے ابتدائی چار روز کے دوران جاری پرائس چیکنگ مہم کی تفصیلی رپورٹ جاری کرتے ہوئے کہا ہے کہ گراں فروشی اور منافع خوری کے خلاف سخت اور بلاامتیاز کارروائیاں جاری ہیں۔
بہادرآباد مرکز پر ایم کیو ایم پاکستان کی مرکزی کمیٹی کا اجلاس، سیاسی صورتحال اور شہری مسائل پر غور
انہوں نے بتایا کہ چار روز کے دوران کراچی کے مختلف اضلاع میں مجموعی طور پر 30 لاکھ روپے سے زائد کے جرمانے عائد کیے گئے جبکہ 15 سے زائد منافع خوروں کو گرفتار کیا گیا۔ کمشنر کے مطابق ضلعی انتظامیہ، اسسٹنٹ کمشنرز اور پرائس کنٹرول مجسٹریٹس روزانہ کی بنیاد پر مارکیٹوں، سپر اسٹورز، سبزی منڈیوں، گوشت کی دکانوں اور کریانہ اسٹورز کا معائنہ کر رہے ہیں تاکہ سرکاری نرخنامے پر سختی سے عمل درآمد یقینی بنایا جا سکے۔
رپورٹ کے مطابق سب سے زیادہ وزٹس ضلع وسطی میں کیے گئے جہاں متعدد دکانداروں کو مقررہ نرخوں سے زائد قیمت وصول کرنے پر جرمانے کیے گئے، جبکہ ضلع ملیر دوسرے نمبر پر رہا جہاں نرخنامہ آویزاں نہ کرنے اور من مانے نرخ وصول کرنے والوں کے خلاف مقدمات درج کیے گئے۔ دیگر اضلاع میں بھی روزانہ کی بنیاد پر چیکنگ کا سلسلہ جاری ہے۔
سید حسن نقوی نے واضح کیا کہ گراں فروشی، ذخیرہ اندوزی اور مصنوعی قلت پیدا کرنے کی کسی بھی کوشش کو سختی سے روکا جائے گا۔ انہوں نے کہا کہ پرائس کنٹرول قوانین کی خلاف ورزی کرنے والوں کے خلاف جرمانے، گرفتاری اور قانونی کارروائی عمل میں لائی جائے گی اور یہ مہم رمضان المبارک کے پورے مہینے بلا تعطل جاری رہے گی۔
کمشنر کراچی کا کہنا تھا کہ انتظامیہ صرف جرمانوں تک محدود نہیں بلکہ تاجروں میں آگاہی بھی پیدا کر رہی ہے تاکہ وہ سرکاری نرخنامے کی پابندی کریں۔ انہوں نے تاجروں سے اپیل کی کہ ماہِ صیام کی برکتوں کا احترام کرتے ہوئے ناجائز منافع خوری سے گریز کریں۔
انتظامیہ نے شہریوں سے بھی اپیل کی ہے کہ گراں فروشی کی صورت میں فوری طور پر متعلقہ ضلعی انتظامیہ کو اطلاع دیں تاکہ بروقت کارروائی ممکن بنائی جا سکے۔ کمشنر نے عزم ظاہر کیا کہ حکومتِ سندھ کی ہدایات کے مطابق عوام کو زیادہ سے زیادہ ریلیف فراہم کرنے کے لیے تمام دستیاب وسائل بروئے کار لائے جائیں گے۔
