لاڑکانہ (اسٹاف رپورٹر) — وزیراعلیٰ سندھ سید مراد علی شاہ اور ورلڈ بینک کے صدر اجے بانگا نے لاڑکانہ کے گاؤں بہاول جت، تعلقہ ڈوکری کا دورہ کیا اور سندھ پیپلز ہاؤسنگ پروگرام (SPHF) کے تحت سیلاب متاثرہ 145 گھروں کی تعمیر نو کا معائنہ کیا۔
شرجیل انعام میمن کا سی پی اے کانفرنس سے خطاب: مضبوط پارلیمانیں ہی مضبوط جمہورتی نظام کی ضمانت ہیں
وزیراعلیٰ سندھ نے کہا کہ 83 فیصد گھروں کے مالکانہ حقوق خواتین کو دیے گئے ہیں اور خواتین کی معاشی آزادی اور سماجی شمولیت کو فروغ دیا جا رہا ہے۔ انہوں نے بتایا کہ یہ پروگرام دنیا کی سب سے بڑی کمیونٹی قیادت والے ہاؤسنگ منصوبوں میں شامل ہے، جس کے تحت ہر گھر مقامی مزدوروں کے لیے روزگار کے مواقع پیدا کرتا ہے اور مقامی آمدنی برقرار رہتی ہے۔
صدر ورلڈ بینک اجے بانگا نے کہا کہ یہ پروگرام کمیونٹی قیادت میں بحالی کا عالمی ماڈل ہے اور سیلاب متاثرین کے لیے روزگار اور سماجی شمولیت کے مواقع پیدا کرتا ہے۔ انہوں نے کہا کہ ہر خاندان کو تقریباً 1400 ڈالر مالیت کے گھر کی تعمیر کے وسائل فراہم کیے جاتے ہیں اور بینکنگ خدمات تک رسائی بھی یقینی بنائی گئی ہے۔
مراد علی شاہ نے مزید کہا کہ سندھ حکومت اور ورلڈ بینک کے تعاون سے 21 لاکھ گھروں کی تعمیر نو کی جارہی ہے، اور 15 لاکھ سے زائد افراد کے بینک اکاؤنٹس کھولے جا چکے ہیں۔ اس پروگرام میں ماحولیاتی تحفظ، سماجی احتساب اور شفافیت کو یقینی بنایا گیا ہے۔
وزیراعلیٰ اور صدر ورلڈ بینک نے کمیونٹی سینٹر میں خواتین سے ملاقات کی اور خواتین کے ہاتھ سے بنائے گئے ہنر کے سامان اور مصنوعات کا جائزہ لیا۔ صدر ورلڈ بینک نے خواتین کو مالکانہ حقوق کی سندیں بھی تقسیم کیں اور ان کی معاشی اور سماجی شمولیت کی تعریف کی۔
مراد علی شاہ نے کہا کہ پیپلز ہاؤسنگ پروگرام سیلاب متاثرہ گھر بنانے کے لیے عالمی معیار کا ماڈل ہے، جس میں وفاقی حکومت، ورلڈ بینک اور دیگر شراکت دار شامل ہیں۔
صدر ورلڈ بینک اجے بانگا نے کہا کہ صاف پانی، محفوظ گھر اور کمیونٹی قیادت شہریوں کی زندگی میں نمایاں بہتری لانے کے لیے کلیدی عناصر ہیں، اور یہ منصوبہ انسانی سرمائے کی ترقی اور طویل مدتی معاشی مواقع کو مضبوط بنانے کا ذریعہ ہے۔