کراچی: پاکستان رینجرز (سندھ) نے لانڈھی کے علاقے میں مختلف کارروائیوں کے دوران اسلحہ کی غیر قانونی خرید و فروخت، اسٹریٹ کرائم اور موٹر سائیکل چوری میں ملوث دو ملزمان کو گرفتار کر لیا۔ گرفتار ملزمان کی شناخت شیخ یوسارالدین ولد سرکار عالم اور عبدالوھاب ولد عزیزاللہ کے نام سے ہوئی ہے۔
ایف بی آر کے 20 اہلکار ایس ایس یو چوکنڈی ہیڈکوارٹرز میں اسپیشلائزڈ سیکیورٹی کورس مکمل کر کے پاس آؤٹ
رینجرز کے مطابق ملزم شیخ یوسارالدین ایک منظم جرائم پیشہ گینگ کا حصہ ہے جو غیر قانونی اسلحہ کی ترسیل اور اسٹریٹ کرائم کی متعدد وارداتوں میں ملوث رہا ہے، جبکہ ملزم عبدالوھاب موٹر سائیکل چوری کی وارداتوں میں ملوث ایک عادی مجرم ہے، جس کے قبضے سے چوری شدہ موٹر سائیکل بھی برآمد کر لی گئی ہے۔
رینجرز کا کہنا ہے کہ ملزمان کے دیگر ساتھیوں کی گرفتاری کے لیے چھاپے مارے جا رہے ہیں، جبکہ گرفتار ملزمان کو مزید قانونی کارروائی کے لیے پولیس کے حوالے کر دیا گیا ہے۔
پاکستان رینجرز (سندھ) نے عوام سے اپیل کی ہے کہ مشکوک سرگرمیوں یا عناصر کی اطلاع قریبی رینجرز چیک پوسٹ، ہیلپ لائن 1101 یا مددگار واٹس ایپ نمبر 03479001111 پر دیں۔ اطلاع دینے والے کا نام صیغۂ راز میں رکھا جائے گا۔