امریکا میں ایک تاریخی سنگِ میل عبور کرتے ہوئے غزالہ ہاشمی نے پہلی مسلم خاتون نائب گورنر کی حیثیت سے قرآنِ پاک پر اپنے عہدے کا حلف اٹھا لیا۔ یہ تقریب ریاست ورجینیا کی تاریخ میں غیر معمولی اہمیت کی حامل قرار دی جا رہی ہے۔
امریکی جنگی طیاروں کی گرین لینڈ آمد شروع، نوراڈ کی تصدیق
اسی موقع پر ریاست کی تاریخ میں پہلی مرتبہ خاتون رہنما ایبی گیل اسپین برجر نے بطور گورنر عہدہ سنبھالا، جبکہ اٹارنی جنرل کے منصب پر بھی پہلی بار سیاہ فام رہنما جے جونز نے ذمہ داریاں سنبھالیں۔ یوں ورجینیا میں قیادت کے تینوں اہم عہدوں پر تنوع اور شمولیت کی نئی مثال قائم ہو گئی۔
لیفٹیننٹ گورنر غزالہ ہاشمی کی حلف برداری کے موقع پر انٹرفیتھ پریئر بریک فاسٹ کا اہتمام بھی کیا گیا، جس میں امام شریف نے دعا کروائی۔ تقریب میں سینیٹر صدام ازلان سلیم، سینیٹر کنعان سمیت مختلف سیاسی و سماجی شخصیات نے شرکت کی۔
حلف برداری کی تقریب کے دوران ایڈمز اسکاؤٹنگ امریکا اور گرلز اسکاؤٹس کی جانب سے خصوصی پریڈ بھی کی گئی، جس کی قیادت رضوان جاکا، احسن اللہ، بیتھنی رشید اور دیگر نے کی۔
اس موقع پر رضوان جاکا نے امید ظاہر کی کہ نئی قیادت ریاست میں اتحاد، ہم آہنگی اور تنوع کو فروغ دے گی۔ جبکہ ریاستی گورنر کے ایشین امریکن ایڈوائزری بورڈ کے چیئرمین منصور قریشی نے کہا کہ انہیں توقع ہے کہ گورنر، نائب گورنر اور پوری کابینہ بلا تفریق عوام، بالخصوص جنوبی ایشیائی کمیونٹی کی خدمت کو ترجیح دے گی۔