کراچی: وفاقی وزیر ریلوے محمد حنیف عباسی نے 9 جنوری کو کراچی دورے کے دوران چیئرمین کراچی پورٹ ٹرسٹ (کے پی ٹی) ریئر ایڈمرل (ر) شاہد احمد سے ملاقات کی۔ ملاقات میں کراچی پورٹ سے کارگو کی مؤثر ترسیل اور ریلوے نظام کو مضبوط بنانے پر تفصیلی بات چیت ہوئی۔
ای چالان کے بعد کراچی میں ٹریفک پولیس غائب، بدترین جام پر رکن سندھ اسمبلی کا آئی جی سندھ کو خط
وفاقی وزیر ریلوے نے کہا کہ سڑکوں کے بجائے ریل کے ذریعے کارگو کی منتقلی پر سنجیدہ غور کیا جا رہا ہے اور کراچی پورٹ کی لاجسٹکس کارکردگی کو بہتر بنانے کیلئے مشترکہ حکمت عملی اختیار کی جائے گی۔ انہوں نے کارگو ٹرانسپورٹ میں بڑے اصلاحاتی اقدامات کا بھی اعلان کیا۔
محمد حنیف عباسی نے کہا کہ ایم ایل ون منصوبے کا آغاز جولائی 2026 میں کراچی پورٹ سے ہوگا، جبکہ کے پی ٹی تا پپری 54 کلومیٹر طویل ریلوے سیکشن کو اپ گریڈ کیا جائے گا۔ پاکستان ریلوے آئندہ پانچ ماہ میں روزانہ چار فریٹ ٹرینیں چلائے گا اور بلک کارگو کی ترسیل کیلئے ریل کو ترجیح دی جائے گی۔
چیئرمین کے پی ٹی ریئر ایڈمرل شاہد احمد نے کہا کہ کراچی پورٹ کے اندرونی ریلوے ٹریکس کو اپ گریڈ کیا جائے گا اور پورٹ سے منسلک ریلوے انفراسٹرکچر کو مزید مؤثر بنایا جائے گا۔ ملاقات میں دونوں فریقین نے اس عزم کا اظہار کیا کہ باہمی تعاون سے کراچی پورٹ اور پاکستان ریلوے کے درمیان مربوط نظام قائم کیا جائے گا تاکہ قومی اور بین الاقوامی تجارت میں سہولت اور کارکردگی میں اضافہ ہو۔