ایڈیشنل آئی جی کراچی آزاد خان کے احکامات کی روشنی میں کراچی پولیس نے انسدادِ جرائم کے خلاف مؤثر اور کامیاب کارروائیاں انجام دیں۔ ترجمان کراچی پولیس کے مطابق گزشتہ ہفتے کے دوران شہر کے مختلف علاقوں میں ڈاکوؤں کے ساتھ ضلعی پولیس کے 34 مقابلے ہوئے۔
گلشنِ معمار انڈسٹریل ایریا کی فیکٹری میں آتشزدگی، ریسکیو 1122 کی کارروائی جاری
ان مقابلوں کے دوران فائرنگ کے تبادلے میں 7 ملزمان ہلاک جبکہ 41 زخمی ڈاکوؤں سمیت مجموعی طور پر 55 ملزمان کو گرفتار کیا گیا۔ کارروائیوں کے دوران گرفتار ملزمان سے 47 مختلف اقسام کا غیر قانونی اسلحہ، ایک کار اور 20 موٹر سائیکلیں بھی برآمد کی گئیں۔
ترجمان کے مطابق کراچی کے ایسٹ، ویسٹ اور ساؤتھ زونز میں گزشتہ ایک ہفتے کے دوران مجموعی طور پر 795 سے زائد ملزمان کو مختلف جرائم میں گرفتار کیا گیا۔
پولیس کی جانب سے منشیات کے خلاف جاری مہم کے دوران مختلف علاقوں سے لاکھوں روپے مالیت کی 28 کلو 855 گرام چرس، آئس/کرسٹل اور ہیروئن برآمد کی گئی۔ اس کے علاوہ شہریوں سے لوٹ مار اور دیگر وارداتوں میں استعمال ہونے والا 154 سے زائد مختلف اقسام کا غیر قانونی اسلحہ بمعہ ایمونیشن بھی قبضے میں لیا گیا۔
کراچی پولیس نے مختلف کارروائیوں کے دوران مجموعی طور پر چھینی اور چوری شدہ 34 موٹر سائیکلیں اور 3 بڑی گاڑیاں بھی برآمد کیں۔
ترجمان کراچی پولیس کے مطابق شہر میں جرائم کے خاتمے، امن و امان کی بحالی اور عوام کے تحفظ کے لیے پولیس کی کارروائیاں آئندہ بھی اسی تسلسل کے ساتھ جاری رہیں گی۔