ایف آئی اے امیگریشن سیالکوٹ نے بروقت کارروائی کرتے ہوئے جعلی سفری دستاویزات پر بیرون ملک جانے کی کوشش ناکام بنا دی۔ ترجمان ایف آئی اے کے مطابق سیالکوٹ ایئرپورٹ پر امیگریشن کلیئرنس کے دوران دو مسافروں کو مشکوک دستاویزات پر آف لوڈ کر دیا گیا۔
حکام کے مطابق مسافر فلائٹ نمبر EK-629 کے ذریعے ورک ویزے پر سائپرس جا رہے تھے۔ گرفتار مسافروں کی شناخت عامر جمیل اور کاشف علی کے نام سے ہوئی ہے، جن کا تعلق قصور سے بتایا جا رہا ہے۔ امیگریشن چیکنگ کے دوران ان کے پاسپورٹس پر سائپرس کے جعلی ویزے پائے گئے۔
ابتدائی تفتیش کے مطابق مسافروں نے بیرون ملک جانے کے لیے عامر نامی ایجنٹ سے رابطہ کیا تھا، جس سے انہوں نے فی کس 18 لاکھ روپے کے عوض جعلی ویزے حاصل کیے۔ ایف آئی اے حکام کا کہنا ہے کہ مسافروں کو مزید قانونی کارروائی اور ایجنٹ کی نشاندہی کے لیے ایف آئی اے کمپوزٹ سرکل سیالکوٹ کے حوالے کر دیا گیا ہے۔
ترجمان ایف آئی اے کے مطابق انسانی اسمگلنگ اور جعلی دستاویزات میں ملوث عناصر کے خلاف کارروائیاں جاری رہیں گی۔