کراچی: کیماڑی پاک کالونی پولیس نے ایک پانچ رکنی انتہائی خطرناک ڈکیتی گروہ گرفتار کر لیا جو شہر کے مختلف علاقوں میں ڈکیتی اور لوٹ مار کی وارداتوں میں ملوث تھا۔ ایس ایس پی کیماڑی امجد احمد شیخ کے مطابق گروہ نے 100 سے زائد ڈکیتی کے واقعات انجام دیے۔
پولیس نے مختلف چھاپوں کے دوران گروہ کے پانچ ارکان کو حراست میں لیا اور ملزمان کے قبضے سے تین پستول، چھنے ہوئے 9 موبائل فون، نقدی رقم، اور دو موٹر سائیکلیں برآمد کر لی گئیں۔ ملزمان کی شناخت لیاقت، شہنشاہ، طالب، راشد اور رحمان کے ناموں سے ہوئی ہے۔
ابتدائی تفتیش کے مطابق ملزمان چھینے ہوئے موبائل فونز کے پرزے نکال کر فروخت کرتے تھے اور کار سوار فیملیز کو بھی لوٹتے تھے۔ گروہ بلدیہ، سائٹ کے صنعتی علاقے اور نیو ٹاؤن سمیت شہر کے مختلف حصوں میں لوٹ مار میں ملوث تھا۔
ملزمان کے خلاف تھانہ پاک کالونی میں 11 سے زائد مقدمات درج ہیں جن میں ڈکیتی، موٹر سائیکل چوری، موبائل فون چھیننا اور پولیس پر فائرنگ شامل ہیں، جبکہ گرفتار ملزمان سے مزید تفتیش جاری ہے۔