ڈسٹرکٹ ویسٹ کے مختلف علاقوں میں جرائم کے خاتمے اور امن و امان کے قیام کے لیے پولیس کی جانب سے روزانہ کی بنیاد پر ٹارگیٹڈ کومبنگ اور سرچ آپریشنز کا سلسلہ جاری ہے۔ ایس ایس پی ویسٹ طارق الٰہی مستوئی کی ہدایات پر امشب بھی تھانہ گلشن معمار کی حدود میں واقع ملا عیسیٰ گوٹھ اور انور مری گوٹھ میں وسیع پیمانے پر کومبنگ آپریشن کیا گیا۔
کمشنر کراچی کی ہدایت پر اسسٹنٹ کمشنر حاظم بھنگوار کا صدر میں تجاوزات کے خلاف بڑا آپریشن 40 دکانیں سیل
پولیس حکام کے مطابق سرچ آپریشن سے قبل علاقے کے داخلی اور خارجی راستوں کو مکمل طور پر سیل کر کے ہدفی مقامات کی تلاشی لی جا رہی ہے۔ دورانِ آپریشن بائیومیٹرک ڈیوائسز کی مدد سے مشتبہ افراد کی شناخت اور تصدیق کا عمل بھی جاری ہے۔
یہ کارروائی ڈی ایس پی سرجانی کی زیر نگرانی کی جا رہی ہے، جس میں ایس ایچ او گلشن معمار، پولیس نفری، لیڈیز اسٹاف اور انٹیلیجنس اسٹاف نے شرکت کی۔ پولیس اہلکار مشتبہ افراد اور گھروں کی تلاشی لے کر جرائم پیشہ عناصر کی بیخ کنی کے لیے سرگرم ہیں۔
پولیس کے مطابق سرچ آپریشن کا بنیادی مقصد علاقے میں امن و امان کی صورتحال کو بہتر بنانا، عوام کے جان و مال کا تحفظ یقینی بنانا اور جرائم میں ملوث عناصر کو قانون کے کٹہرے میں لانا ہے۔ ڈسٹرکٹ ویسٹ پولیس کا کہنا ہے کہ ایسے آپریشنز آئندہ بھی بلا تعطل جاری رہیں گے۔
