کارپوریٹ ٹیکس آفس (سی ٹی او) لاہور نے مؤثر کارروائی کے دوران 2 ارب 64 کروڑ 60 لاکھ روپے کی خطیر رقم بطور انکم ٹیکس ریکور کرلی ہے۔
اسلام آباد میں 26 دسمبر کو عام تعطیل کا اعلان، کابینہ ڈویژن کا نوٹیفیکیشن جاری
فیڈرل بورڈ آف ریونیو (ایف بی آر) کی جانب سے جاری بیان کے مطابق یہ ریکوری ایک ایسے ٹیکس دہندہ سے کی گئی جس کے خلاف واجب الادا انکم ٹیکس کی تشخیص مکمل کی گئی تھی۔ متعلقہ ٹیکس دہندہ اپنی قانونی ذمہ داریاں پوری کرنے میں ناکام رہا، جس کے بعد تشخیصی کارروائی کی کامیاب تکمیل پر ٹیکس ڈیمانڈ متعین کی گئی۔
بیان میں کہا گیا کہ کارپوریٹ ٹیکس آفس لاہور نے نہ صرف ایک ہی کیس میں بھاری مالیت کا ٹیکس ڈیمانڈ قائم کیا بلکہ تمام قانونی تقاضوں کو پیشہ ورانہ انداز میں پورا کرتے ہوئے متعلقہ قوانین کی دفعات کے مطابق اس کی مکمل ریکوری بھی یقینی بنائی۔
ایف بی آر کے مطابق یہ کارروائی اعلیٰ مالیت کے مقدمات کو مؤثر انداز میں نمٹانے، سرکاری محاصل کے تحفظ اور فیلڈ فارمیشنز کی پیشہ ورانہ صلاحیت کی عکاس ہے۔
ترجمان ایف بی آر نے کہا کہ اس اقدام سے ٹیکس نادہندگی کے سنگین معاملات کے خلاف ایف بی آر کے مضبوط اور واضح مؤقف کی عکاسی ہوتی ہے، جبکہ اس تمام عمل میں قانونی تقاضوں اور اصولِ انصاف کو بھی یقینی بنایا گیا۔
ممبر ان لینڈ ریونیو آپریشنز نے سی ٹی او لاہور کے افسران کی ٹیکس قوانین کے مؤثر نفاذ اور عوامی محاصل کے تحفظ کے لیے کی جانے والی انتھک کوششوں کو سراہا۔ ایف بی آر نے رضاکارانہ ٹیکس تعمیل کو فروغ دینے کے عزم کا اعادہ کرتے ہوئے واضح کیا کہ عدم تعمیل کے خلاف فیصلہ کن کارروائیاں آئندہ بھی جاری رہیں گی۔