اسلام آباد: چیف آف ڈیفنس اسٹاف فیلڈ مارشل عاصم منیر نے کہا ہے کہ دشمن عناصر کھلے تصادم کی بجائے بالواسطہ اور مبہم حربے اختیار کر رہے ہیں، جن میں اندرونی کمزوریوں سے فائدہ اٹھانے کے لیے پراکسیز کا استعمال شامل ہے۔
کمانڈر رائل بحرین نیول فورس کی پاک بحریہ کے چیف آف دی نیول اسٹاف سے ملاقات
آئی ایس پی آر کے مطابق فیلڈ مارشل عاصم منیر نے نیشنل ڈیفنس یونیورسٹی اسلام آباد کا دورہ کیا، جہاں انہیں نیشنل سکیورٹی اینڈ وار کورس کے سول اور عسکری پینلز نے قومی سلامتی کو درپیش چیلنجز پر بریفنگ دی۔
فیلڈ مارشل نے کہا کہ ملک کو وسیع اور مسلسل نوعیت کے چیلنجز کا سامنا ہے، جو روایتی، غیر روایتی، انٹیلی جنس، سائبر، اطلاعاتی، عسکری، معاشی اور دیگر شعبوں پر محیط ہیں۔ ان چیلنجز سے نمٹنے کے لیے ہمہ جہتی تیاری اور قومی طاقت کے تمام عناصر کی ہم آہنگی ناگزیر ہے۔
انہوں نے مزید کہا کہ مستقبل کے رہنماؤں کو ان چیلنجز کو پہچاننے اور مؤثر مقابلے کی تربیت دی جانی چاہیے۔ فیلڈ مارشل نے پیشہ ورانہ عسکری تعلیم کی اہمیت پر زور دیتے ہوئے کہا کہ یہ ادارہ جاتی صلاحیت کو مضبوط بنانے اور طویل المدتی قومی استحکام کو یقینی بنانے میں کلیدی کردار ادا کرتی ہے۔
انہوں نے شرکاء سے کہا کہ دیانت، نظم و ضبط، بے لوث خدمت کی اقدار برقرار رکھیں اور ہر لمحہ چوکس اور ثابت قدم رہیں۔