اسلام آباد: چیئرمین پاکستان کرکٹ بورڈ محسن نقوی کی زیر صدارت پی سی بی بورڈ آف گورنرز کا اجلاس ویڈیو لنک کے ذریعے منعقد ہوا، جس میں کرکٹ انفراسٹرکچر، پی ایس ایل اور مستقبل کے بین الاقوامی ٹورنامنٹس سے متعلق اہم فیصلے کیے گئے۔
اے این ایف کا تعلیمی اداروں اور مختلف شہروں میں منشیات اسمگلنگ کے خلاف بھرپور کریک ڈاؤن
اجلاس میں نیشنل کرکٹ اسٹیڈیم کراچی کی تعمیرِ نو کے دوسرے مرحلے کی باضابطہ منظوری دی گئی، جبکہ ایل سی سی اے گراؤنڈ کو اوول گراؤنڈ کی طرز پر اپ گریڈ کرنے کا فیصلہ بھی کیا گیا۔ بورڈ آف گورنرز نے ایل سی سی اے گراؤنڈ کی اپ گریڈیشن کی متفقہ منظوری دے دی۔
بورڈ اجلاس کے دوران پی ایس ایل لندن اور نیویارک روڈ شوز کی کامیابی پر چیئرمین پی سی بی محسن نقوی اور ان کی ٹیم کی محنت، پیشہ ورانہ صلاحیتوں اور حکمتِ عملی کو سراہا گیا۔ اسی طرح سری لنکن ٹیم کے حالیہ دورہ پاکستان کو جاری رکھنے کے لیے چیئرمین پی سی بی کی ذاتی کاوشوں کو بھی خراجِ تحسین پیش کیا گیا۔
بورڈ آف گورنرز کے اراکین نے چیئرمین پی سی بی محسن نقوی سے اظہارِ تشکر کی قرارداد بھی منظور کی۔ اس موقع پر محسن نقوی کا کہنا تھا کہ سری لنکن ٹور کو جاری رکھنے کا کریڈٹ کسی ایک فرد کو نہیں بلکہ پوری ٹیم کو جاتا ہے۔ انہوں نے کہا کہ ہم نے خلوصِ نیت سے محنت کی اور اللہ تعالیٰ نے ہمیں کامیابی عطا کی۔
چیئرمین پی سی بی نے کہا کہ پی ایس ایل روڈ شوز کی کامیابی پی سی بی اور پی ایس ایل کی پوری ٹیم کی مشترکہ کامیابی ہے اور لیگ کو ایک عالمی برانڈ بنانے کے لیے سب نے شبانہ روز انتھک محنت کی۔ انہوں نے اس عزم کا اظہار کیا کہ پی ایس ایل 11 کے میچز مظفرآباد اسٹیڈیم میں کرانے کی بھرپور کوشش کی جا رہی ہے اور مستقبل میں وہاں بین الاقوامی میچز بھی منعقد کیے جائیں گے۔
محسن نقوی نے اعلان کیا کہ اسلام آباد میں ایک اسٹیٹ آف دی آرٹ کرکٹ اسٹیڈیم تعمیر کیا جائے گا۔ اجلاس کو آگاہ کیا گیا کہ ریجنل سطح پر ایک معروف نجی فرم نے کلبز کی اسکرونٹی کا عمل شروع کر دیا ہے۔
چیف ایگزیکٹو آفیسر پی ایس ایل سلمان نصیر نے پی ایس ایل روڈ شوز سے متعلق تفصیلی بریفنگ دی، جبکہ بورڈ کو مستقبل کے آئی سی سی ویمنز اور مینز کرکٹ ٹورنامنٹس، ڈومیسٹک کرکٹ کے ڈھانچے کو مضبوط بنانے اور نچلی سطح پر ٹورنامنٹس و میچز کی تعداد بڑھانے سے متعلق بھی آگاہ کیا گیا۔
اجلاس میں بورڈ آف گورنرز کے اراکین اسماعیل قریشی، طارق سرور، سجاد علی کھوکھر، انوار غنی، ظہیر عباس اور تنویر احمد نے شرکت کی۔ اس کے علاوہ ظفر اللہ، مصطفےٰ رمڈے، عدنان ملک، ایڈیشنل سیکرٹری کابینہ ڈویژن، چیف آپریٹنگ آفیسر پی سی بی سمیر احمد، چیف ایگزیکٹو آفیسر پی ایس ایل سلمان نصیر، چیف فنانشل آفیسر، ڈائریکٹر انفراسٹرکچر، ڈومیسٹک کرکٹ، کمرشل اور دیگر متعلقہ حکام بھی اجلاس میں شریک ہوئے۔