ایبٹ آباد: ڈاکٹر وردہ مشتاق کے ہائی پروفائل قتل کیس کا مرکزی ملزم اتوار کی شام ٹھنڈیانی کے قریب مبینہ پولیس مقابلے میں ہلاک ہو گیا۔
ڈان میڈیا گروپ کے ٹی وی اور ریڈیو پر سرکاری اشتہارات کی مبینہ بندش، میڈیا تنظیموں کی شدید مذمت
پولیس ذرائع کے مطابق ہلاک ملزم شمریز کی لاش کو ڈسٹرکٹ ہیڈکوارٹرز اسپتال منتقل کر دیا گیا ہے۔ حکام کا کہنا ہے کہ ٹھنڈیانی کنڈلا کے علاقے میں مسلح ملزمان کے خلاف ایک ٹارگٹڈ کارروائی کی گئی، جس دوران گرفتاری کی کوشش پر ملزم نے مزاحمت کی اور فائرنگ کے تبادلے میں موقع پر ہی مارا گیا۔
حکام کے مطابق شمریز ایک خطرناک اور مطلوب مجرم تھا جو رواں ماہ کے آغاز میں ڈاکٹر وردہ مشتاق کے بہیمانہ اغوا اور قتل کے بعد سے قانون نافذ کرنے والے اداروں کو مطلوب تھا اور مسلسل روپوش رہا۔
ڈاکٹر وردہ مشتاق، جو ڈسٹرکٹ ہیڈکوارٹرز اسپتال میں میڈیکل آفیسر کے فرائض انجام دے رہی تھیں، کو اغوا کے بعد قتل کر دیا گیا تھا۔ اس واقعے پر خیبرپختونخوا بھر میں شدید غم و غصے اور احتجاج دیکھنے میں آیا تھا۔
واقعے کے بعد پولیس نے متعدد ملزمان کو گرفتار کیا تھا، تاہم مرکزی ملزم شمریز کی عدم گرفتاری پر عوامی دباؤ بڑھتا جا رہا تھا، جس کے پیش نظر پولیس نے سرچ اور انٹیلی جنس بیسڈ کارروائیاں تیز کر دی تھیں۔ صوبائی حکومت کی جانب سے شفاف اور جامع تحقیقات کے لیے ایک اعلیٰ سطح مشترکہ تحقیقاتی ٹیم (جے آئی ٹی) بھی قائم کی گئی تھی۔
اتوار کی شب پولیس لائنز میں بلائی گئی ہنگامی پریس کانفرنس سے خطاب کرتے ہوئے ڈی پی او ایبٹ آباد ہارون الرشید نے بتایا کہ شمریز پولیس مقابلے میں ہلاک ہوا جبکہ اس کے دو ساتھی ٹھنڈیانی کے جنگلات کی جانب فرار ہو گئے۔
ڈی پی او کے مطابق پولیس کو اطلاع ملی تھی کہ ڈاکٹر وردہ قتل کیس کا مرکزی اور مفرور ملزم اپنے ساتھیوں کے ہمراہ ٹھنڈیانی کنڈ میں موجود ہے، جس پر فوری کارروائی کی گئی۔ انہوں نے بتایا کہ پولیس چھاپے کے دوران ملزمان نے فائرنگ شروع کر دی، جس کے نتیجے میں جوابی کارروائی میں شمریز مارا گیا۔
ہارون الرشید نے کہا کہ فرار ہونے والے ملزمان کی گرفتاری کے لیے سرچ آپریشن جاری ہے۔ ان کے مطابق شمریز کی لاش بعد ازاں ایوب میڈیکل کمپلیکس منتقل کی گئی، تاہم میڈیا کو لاش تک رسائی نہیں دی گئی۔
ڈی پی او نے مزید کہا کہ شمریز کی گرفتاری پولیس کے لیے ایک بڑا چیلنج بنی ہوئی تھی، جس کے خاتمے سے کیس کی تحقیقات میں اہم پیش رفت متوقع ہے۔