کراچی: وزیراعلیٰ سندھ سید مراد علی شاہ نے کراچی کی سڑکوں اور گلیوں کی تعمیر و مرمت کے لیے 25 ارب روپے کی منظوری دے دی۔
وزیر اعلیٰ ہاؤس میں مراد علی شاہ کی زیر صدارت اجلاس میں کراچی میں جاری ترقیاتی منصوبوں کا جائزہ لیا گیا۔ اجلاس میں وزیر بلدیات سید ناصر شاہ، میئر کراچی مرتضیٰ وہاب، چیف سیکرٹری آصف حیدر شاہ، پرنسپل سیکرٹری وزیراعلیٰ آغا واصف، سینیئر ممبر بورڈ آف ریونیو خالد حیدر شاہ اور دیگر اعلیٰ افسران نے شرکت کی۔
وزیراعلیٰ سندھ نے شہر کی 315 اندرونی سڑکوں اور گلیوں کے ساتھ ساتھ 60 بڑی سڑکوں کی تعمیر نو کے لیے فنڈز کی منظوری دیتے ہوئے کہا کہ شہریوں کو خستہ حال انفرا اسٹرکچر اور ٹریفک جام سے نجات دلانے میں فنڈز رکاوٹ نہیں ہوں گے، تاہم تعمیر نو کا کام فوری طور پر شروع ہونا ضروری ہے۔