چیمپیئنز لیگ کے گروپ مرحلے میں بارسلونا نے شاندار کارکردگی کا مظاہرہ کرتے ہوئے اولمپیاکوس کو 1-6 سے عبرتناک شکست دی۔ اس فتح میں مرکزی کردار فیرمین لوپیز کی شاندار ہیٹ ٹرک اور مارکس راشفورڈ کے دو گول رہے، جب کہ نوجوان اسٹار لامین یامل نے نہ صرف گول کیا بلکہ تاریخ بھی رقم کر دی۔
ہالینڈ کا ایک اور ریکارڈ چیمپیئنز لیگ میں 53 واں گول مانچسٹر سٹی نے ولاریال کو باآسانی شکست دی
میچ کے آغاز میں ساتویں منٹ میں یامل کی شاندار موو کے بعد لوپیز نے ریباؤنڈ پر پہلا گول اسکور کیا، جب کہ آدھے گھنٹے بعد انہوں نے ڈرو فرنینڈز کے پاس پر بائیں پاؤں کی خوبصورت کک کے ساتھ اسکور 0-2 کر دیا۔
دوسرے ہاف کا آغاز ڈرامائی انداز میں ہوا۔ اولمپیاکوس کے ایوب الکعبی کا ہیڈر ابتدائی طور پر گول قرار دیا گیا، مگر وی اے آر چیک کے بعد اسے آف سائیڈ قرار دے کر منسوخ کر دیا گیا۔ تاہم، اسی لمحے ریفری نے ایرک گارسیا کے ہینڈ بال پر پنالٹی دی، جسے الکعبی نے پوسٹ کے ذریعے گول میں تبدیل کر کے خسارہ کم کر دیا۔
صرف تین منٹ بعد اولمپیاکوس کے سینٹیاگو ہیزے کو دوسرا پیلا کارڈ دکھا کر میدان سے باہر کر دیا گیا، جس کے بعد مہمان ٹیم پوری طرح دباؤ میں آ گئی۔
یہ میچ 18 سالہ لامین یامل کے لیے بھی تاریخی رہا، جو صرف 18 سال اور 100 دن کی عمر میں چیمپیئنز لیگ میں 25 میچ کھیلنے والے سب سے کم عمر کھلاڑی بن گئے۔ انہوں نے خود پر ہونے والے فاؤل پر پنالٹی حاصل کی، جسے راشفورڈ نے کامیابی سے گول میں بدلا۔
اس کے بعد بارسلونا نے میچ پر مکمل کنٹرول حاصل کر لیا۔ 74ویں منٹ میں راشفورڈ نے شاندار کم شاٹ کے ذریعے دوسرا گول کیا، اور صرف دو منٹ بعد لوپیز نے باکس کے کنارے سے اپنا تیسرا گول کر کے چیمپیئنز لیگ میں بارسلونا کے لیے ہیٹ ٹرک کرنے والے پہلے ہسپانوی کھلاڑی ہونے کا اعزاز حاصل کیا۔
راشفورڈ نے آخری لمحات میں ایک اور عمدہ کراس فیلڈ پاس پر اپنا دوسرا گول داغا۔ مانچسٹر یونائیٹڈ کے سابق اسٹار نے بارسلونا کے ساتھ صرف چند میچوں میں ہی دو بار ایک سے زیادہ گول اسکور کیے ہیں، جب کہ یونائیٹڈ کے ساتھ وہ یہ کارنامہ صرف ایک بار انجام دے سکے تھے۔
میچ کے بعد بارسلونا کے کوچ ہانزی فلک نے کہا، “راشفورڈ نے شاندار کھیل پیش کیا۔ نو نمبر کے کردار میں کھیلنا آسان نہیں ہوتا، مگر اس نے اپنی کارکردگی سے ٹیم کو مضبوط کیا۔ سب سے اہم بات یہ ہے کہ وہ وہی دے رہا ہے جو میں اس سے چاہتا ہوں — 100 فیصد۔”
یہ 2017 میں پیرس سینٹ جرمین کو 1-6 سے شکست دینے کے بعد پہلا موقع ہے جب بارسلونا نے کسی چیمپیئنز لیگ میچ میں چھ گول کیے ہیں۔
تین میچوں کے بعد بارسلونا کے چھ پوائنٹس ہیں، جبکہ اولمپیاکوس صرف ایک پوائنٹ کے ساتھ گروپ میں آخری نمبر پر ہے اور اپنے آخری 12 چیمپیئنز لیگ اوے میچز میں مسلسل شکستوں کا شکار ہے۔