چیمپیئنز لیگ کے ایک شاندار مقابلے میں پیرس سینٹ جرمین (پی ایس جی) نے منگل کی شب میزبان بائر لیورکوسن کو 7-2 سے عبرتناک شکست دے دی۔ میچ کے پہلے ہاف میں محض سات منٹ کے دوران تین گول کر کے فرانسیسی ٹیم نے برتری حاصل کی، جبکہ دونوں ٹیموں نے تقریباً ایک گھنٹے تک 10، 10 کھلاڑیوں کے ساتھ کھیل جاری رکھا۔
صدر آصف علی زرداری 4 سے 6 نومبر تک قطر میں عالمی سماجی ترقی کانفرنس میں شرکت کریں گے
پی ایس جی کی جانب سے ڈیزائر ڈوئے نے دو گول اسکور کیے، جس کی بدولت کلب نے چیمپیئنز لیگ میں مسلسل چھٹی کامیابی حاصل کرتے ہوئے نیا ریکارڈ قائم کیا۔ تین میچوں کے بعد ٹیم زیادہ سے زیادہ نو پوائنٹس کے ساتھ لیگ فیز ٹیبل میں سرفہرست ہے۔
عثمان ڈیمبیلے، جو چوٹ کے بعد واپسی کر رہے تھے، نے بھی گول داغ کر اپنی موجودگی کا بھرپور احساس دلایا۔ اس جیت کے ساتھ پی ایس جی نے لیورکوسن کے یورپی حریفوں کے خلاف گھر پر نو میچوں کی ناقابلِ شکست رن کا بھی خاتمہ کر دیا۔
میچ کے بعد پی ایس جی کے کوچ لوئس اینریک نے کہا، “یہ احساس بہت مثبت ہے، ٹیم نے شاندار کھیل پیش کیا۔ کھلاڑی کے بھیجے جانے کے بعد میچ تھوڑا پیچیدہ ہو گیا تھا، لیکن ہم نے اپنی حکمت عملی پر عمل کیا اور مکمل طور پر جیت کے مستحق تھے۔”
میچ کے آغاز میں پی ایس جی نے صرف ساتویں منٹ میں ولین پچو کے ہیڈر کی بدولت برتری حاصل کی۔ لیورکوسن کے الیجینڈرو گریمالڈو نے 25ویں منٹ میں پینلٹی ضائع کر دی، جس کے بعد حالات مزید خراب ہوتے چلے گئے۔
لیورکوسن کے کپتان رابرٹ اینڈریچ کو 32ویں منٹ میں فاؤل کے باعث ریڈ کارڈ دکھایا گیا، جب کہ کچھ دیر بعد پی ایس جی کے ایلیا زبارنی بھی فاؤل پر باہر بھیج دیے گئے۔
ایلیکس گارسیا نے پینلٹی پر گول کر کے لیورکوسن کو واپس میچ میں لانے کی کوشش کی، لیکن تین منٹ بعد ہی ڈوئے نے دوبارہ برتری دلا دی۔ وقفے سے قبل خویچا کواراتسخیلیا نے تیسرا گول کیا، اور ہاف ٹائم تک اسکور 3-1 ہو گیا۔
دوسرے ہاف میں پی ایس جی نے حریف کو مکمل طور پر بے بس کر دیا۔ نونو مینڈس، ڈیمبیلے اور وتنہا کے گولز نے اسکور 7-2 تک پہنچا دیا۔
میچ کے بعد لیورکوسن کے کوچ کاسپر ہجلمند نے کہا، “ہم بہت مایوس ہیں، یہ بڑا نقصان ہے۔ فیصلہ کن لمحات وہ سات منٹ تھے جن میں ہم نے میچ کھو دیا۔”
لیورکوسن تین میچوں میں دو پوائنٹس کے ساتھ 36 ٹیموں کی چیمپیئنز لیگ ٹیبل میں 27 ویں نمبر پر ہے، جبکہ پی ایس جی اگلے میچ میں بائرن میونخ کی میزبانی کے بعد 5 نومبر کو بینفیکا کے خلاف میدان میں اترے گی۔