دفترِ خارجہ کے مطابق نائب وزیرِاعظم و وزیرِ خارجہ سینیٹر اسحٰق ڈار نے گزشتہ رات دیر گئے سعودی عرب کے وزیرِ خارجہ شہزادہ فیصل بن فرحان کے ساتھ ٹیلیفونک گفتگو کی، جس میں خطے کی تازہ ترین صورتحال خصوصاً غزہ اور فلسطین کے امور پر تفصیلی تبادلہ خیال کیا گیا۔
پاک بحریہ کی بڑی کامیابی بین الاقوامی آپریشن میں 96 کروڑ ڈالر سے زائد منشیات ضبط
ترجمان دفترِ خارجہ کے مطابق یہ بات چیت دونوں رہنماؤں کے درمیان ہونے والی سابقہ ملاقاتوں کے تسلسل میں تھی۔ دونوں فریقوں نے خطے میں پائیدار امن اور استحکام کے لیے اپنے مشترکہ عزم کا اعادہ کیا اور باہمی دلچسپی کے امور پر قریبی رابطے میں رہنے پر اتفاق کیا۔
بیان میں مزید کہا گیا ہے کہ پاکستان اور سعودی عرب، دونوں، مسلم اُمہ کے مفاد میں غزہ میں انسانی بحران کے خاتمے اور اسرائیلی جارحیت روکنے کے لیے بین الاقوامی سطح پر سفارتی کوششوں میں متحرک کردار ادا کر رہے ہیں۔
واضح رہے کہ پاکستان اور سعودی عرب اُن 8 مسلم ممالک میں شامل تھے جنہوں نے ماضی میں امریکی انتظامیہ کے ساتھ مل کر اسرائیل کی جارحیت کے خاتمے اور جنگ بندی کے منصوبے پر کام کیا تھا۔
اس ماہ کے آغاز میں دونوں ممالک نے اسرائیلی حکومت اور حماس کے درمیان جنگ بندی معاہدے کا خیر مقدم کیا تھا۔ سعودی عرب نے امید ظاہر کی تھی کہ یہ اقدام دو سالہ مسلسل اسرائیلی بمباری کے بعد امن کے قیام کا باعث بنے گا۔
دونوں ممالک کے درمیان دیرینہ اور کثیرالجہتی تعلقات قائم ہیں، جو عسکری تعاون، اقتصادی مفادات اور اسلامی ورثے پر مبنی ہیں۔ سعودی عرب پاکستان کے لیے توانائی، مالی معاونت اور سرمایہ کاری کا ایک بڑا ذریعہ ہے۔
یاد رہے کہ ستمبر 2025 میں پاکستان اور سعودی عرب کے درمیان اسٹریٹجک دفاعی معاہدہ بھی طے پایا تھا، جس کے مطابق کسی ایک ملک پر حملہ دونوں پر حملہ تصور کیا جائے گا۔