مغربی سرحد پر افغان طالبان کی جارحیت کے پیشِ نظر وزیراعظم شہباز شریف نے ملکی سیکیورٹی پر غور کے لیے اہم اعلیٰ سطحی اجلاس طلب کر لیا ہے۔ اجلاس میں چاروں صوبوں کے وزرائے اعلیٰ، وزیراعظم آزاد جموں و کشمیر اور وزیراعلیٰ گلگت بلتستان شرکت کریں گے۔
لاہور عظمیٰ بخاری کا تہیۂ عزم ٹی ایل پی پر پابندی کی سمری وفاق بھیجے جانے کی تصدیق لاؤڈ اسپیکر اور غیر قانونی اسلحے پر سخت اقدام
ذرائع کے مطابق اجلاس میں ملک کی مجموعی سیکیورٹی صورتحال، افغانستان کے ساتھ جاری کشیدگی اور سرحدی واقعات کا تفصیلی جائزہ لیا جائے گا جبکہ وزیراعظم شرکا کو آئندہ حکومتی اقدامات سے متعلق اعتماد میں لیں گے۔
یاد رہے کہ پاکستان اور افغان طالبان کے درمیان آج دوحہ میں مذاکرات منعقد ہو رہے ہیں، جس میں افغان وفد کی قیادت وزیرِ دفاع ملا یعقوب کر رہے ہیں اور پاکستان کی طرف سے سینئر سیکیورٹی حکام شرکت کر رہے ہیں۔
وزیراعظم شہباز شریف نے گزشتہ روز وفاقی کابینہ کے اجلاس میں کہا تھا کہ افغان درخواست پر 48 گھنٹے کی عارضی جنگ بندی کی منظوری دی گئی ہے اور اگر طالبان ہماری جائز شرائط پر بات چیت کریں تو پاکستان مذاکرات کے لیے تیار ہے۔ انہوں نے الزام لگایا کہ افغانستان سے آپریٹ ہونے والے دہشت گردوں کو کھلی چھٹی ملی ہوئی ہے اور افغان حکومت امن کے حق میں تعاون سے گریزاں ہے۔
شہباز شریف نے کہا کہ پاکستان نے طویل عرصے تک افغان مہاجرین اور عوام کی میزبانی کی ہے، تاہم سرحدی حملوں اور دہشت گردانہ کارروائیوں کے باعث صبر کا پیمانہ لبریز ہو چکا ہے۔
پس منظر کے طور پر واضح رہے کہ 11 اور 12 اکتوبر کی درمیانی شب افغان طالبان کی جانب سے مبینہ بلااشتعال فائرنگ ریکارڈ ہوئی تھی، اور اس کے بعد پاک افواج نے جواب میں کارروائیاں کیں جن میں عسکری گروہوں کو نقصان پہنچنے کے دعوے کیے گئے۔ افغان وزارتِ دفاع نے بھی دفعہ وارجوابی کاروائیاں کرنے کا عندیہ دیا تھا۔
سرحدی کشیدگی کے باعث وفاقی اور صوبائی سطح پر حفاظتی اقدامات اور تیاریاں تیز کر دی گئی ہیں جبکہ حکومتی سطح پر مسئلے کے پائیدار حل کے لیے مذاکرات اور سفارتی رابطوں پر بھی زور دیا جا رہا ہے۔