کراچی (اسٹاف رپورٹر) — امریکی بحری جہاز یو ایس ایس وین ای۔ میئر (USS Wayne E. Meyer) دو روزہ دورے پر کراچی بندرگاہ پہنچ گیا۔ یہ دورہ پاک بحریہ اور امریکی بحریہ کے درمیان جاری تعاون میں ایک اہم سنگِ میل قرار دیا جا رہا ہے۔
امریکی جہاز کی آمد پر پاک بحریہ کے اعلیٰ حکام نے مہمان عملے کا پرتپاک استقبال کیا۔ اس موقع پر امریکہ کے ناظم الامور (Chargé d’ Affaires) اور امریکی قونصل خانے کے نمائندے بھی موجود تھے۔
دورے کے دوران امریکی بحری جہاز کا عملہ مختلف پیشہ ورانہ سرگرمیوں، مشترکہ مشقوں اور تربیتی سیشنز میں حصہ لے گا، جن کا مقصد دونوں ممالک کی بحری افواج کے درمیان تعاون کو فروغ دینا اور پیشہ ورانہ صلاحیتوں کا تبادلہ ہے۔
یہ دورہ شمالی بحیرۂ عرب میں PASSEX بحری مشق کے ساتھ اختتام پذیر ہوگا، جس میں یو ایس ایس وین ای۔ میئر اور پاک بحریہ کے جہاز مشترکہ طور پر حصہ لیں گے۔
ڈائریکٹر جنرل پبلک ریلیشنز (نیوی) کے مطابق یہ دورہ پاک بحریہ اور امریکی بحریہ کے تعلقات کو مزید مستحکم کرنے کے ساتھ ساتھ علاقائی امن و استحکام اور عالمی بحری سلامتی کے لیے مشترکہ عزم کی تجدید بھی ہے۔
