کراچی (اسٹاف رپورٹر) ضلع ملیر میں سوئی سدرن گیس کمپنی (SSGC) نے پولیس کی بھاری نفری کے ساتھ کارروائی کرتے ہوئے چار ہزار گھروں کو دی جانے والی غیر قانونی گیس سپلائی منقطع کر دی۔ ترجمان کے مطابق گیس چور مافیا نے نیشنل ہائی وے پر گھی مل کے قریب کے الیکٹرک سپلائی آفس کے ساتھ مین ڈسٹری بیوشن لائن سے کلپ لگا کر غیر قانونی کنکشن نکالا ہوا تھا۔
امتیاز میر پر حملہ: ملزمان کو قانون کے کٹہرے میں لایا جائے گا، سعید غنی
کارروائی کے دوران معلوم ہوا کہ بگٹی گوٹھ میں دو ہزار، مری گوٹھ میں ایک ہزار جبکہ عباس ٹاؤن میں پانچ سو گھروں کو غیر قانونی طور پر گیس فراہم کی جا رہی تھی۔ آپریشن کے دوران زیرِ زمین بچھایا گیا تقریباً دو کلومیٹر طویل پائپ بھی قبضے میں لیا گیا۔
ترجمان کے مطابق بھاری مشینری کے ذریعے مین ڈسٹری بیوشن لائن سے غیر قانونی کنکشن کاٹ دیے گئے اور مرمت کے بعد لائن کو بحال کر دیا گیا۔ سوئی سدرن گیس کمپنی نے واضح کیا کہ غیر قانونی کنکشنز کے خلاف کارروائیاں جاری رہیں گی اور ملوث افراد کے خلاف سخت قانونی اقدامات کیے جائیں گے۔