نیویارک: وزیراعظم شہباز شریف نے کہا ہے کہ امریکی صدر ڈونلڈ ٹرمپ امن کے داعی ہیں اور پاکستان بھارت جنگ بندی میں ان اور ان کی ٹیم نے اہم کردار ادا کیا ہے۔
نیویارک میں میڈیا سے گفتگو کرتے ہوئے وزیراعظم نے کہا کہ صدر ٹرمپ دنیا بھر میں امن قائم کرنا چاہتے ہیں، انہوں نے جنرل اسمبلی اجلاس سے خطاب میں بھی امن کے لیے کوششوں پر زور دیا۔ شہباز شریف کا کہنا تھا کہ پاک بھارت جنگ بندی صدر ٹرمپ اور ان کی ٹیم کی کوششوں سے ممکن ہوئی۔
قبل ازیں وزیراعظم شہباز شریف سمیت مسلم ممالک کے سربراہان نے غزہ جنگ کے خاتمے کے لیے صدر ٹرمپ سے ملاقات کی، جس میں امریکی صدر نے فوری سیز فائر اور یرغمالیوں کی رہائی پر زور دیا۔ وزیراعظم نے کہا کہ صدر ٹرمپ کا عزم ظاہر کرتا ہے کہ وہ امن کے علمبردار ہیں، جبکہ امیرِ قطر نے فوری جنگ بندی اور قیدیوں کی رہائی پر زور دیتے ہوئے ثالثی کی آمادگی ظاہر کی۔ اجلاس سے پہلے وزیراعظم نے امیر قطر، اردن کے شاہ عبداللہ اور انڈونیشیا کے صدر سے بھی مشاورت کی۔
اجلاس کے بعد صدر ٹرمپ نے ملاقات کو مفید قرار دیتے ہوئے کہا کہ اس میں تمام بڑے کھلاڑی موجود تھے۔ انہوں نے کہا کہ آئندہ بیٹھک میں اسرائیل بھی شریک ہوگا اور امید ہے کہ جنگ بندی کے لیے مؤثر راستہ نکل آئے گا۔
دوسری جانب وزیراعظم شہباز شریف اور صدر ٹرمپ کی ملاقات کل وائٹ ہاؤس میں طے ہوگئی ہے، جس میں پاکستان کے اعلیٰ حکام بھی وزیراعظم کے ہمراہ ہوں گے۔ اس سے قبل صدر ٹرمپ کی عرب اسلامی سربراہی اجلاس کے موقع پر وزیراعظم شہباز شریف اور اسحاق ڈار سے غیر رسمی خوشگوار ملاقات بھی ہوئی تھی۔